Jot rathai ka surok Brichyrnot, thoh ka Dorbar Shnong sha u DC

U Rangbah Shnong ka shnong Brichyrnot East Jaintia u Bah Stanly Massar u la iathuh ba dangshen ka Dorbar Shnong ka la thoh sha u deputy commissioner (DC) ka East Jaintia Hills ban maramot noh mardor ia ka surok ba pyniasoh shaka surok bah (National Highway 06). Haba kren sha ki lad pathai khubor, u Bah Stanly u la pyntip ba ka surok pyniasoh (Approach Road) na Brichyrnot kaba pyniasoh ia ka NH 06 ka jngai tang kumba 4 km eiei napoh shnong. U Bah Stanly u kam ba ka Star Cement ha u snem 2021 kala shna daka sarok RCC kaba jngai 1.4 Km hapoh shnong.

La sakhi ba kane ka surok RCC ha katei ka shnong ka dang long kaba bha hynrei lah ban iohi ba ka surok kaba dang sah kaba 2.4 km kaba pyniasoh ia ka surok NH 06 ka la jot rathai lut. U Rangbah Shnong Brichyrnot u la ïathuh ba ha u snem 2022 la shna ïa ka surok kaba pynïasoh bad ka surok bah NH 06 bad la siang rong la leh da ka District Minerals Funds (DMF) East Khasi Hills ha ka jinglut kaba T.50 lak tyngka.”Tang hadien katto katne taiew ba la siang rong ia ka surok, ka rong bad ka surok kala shang rong lut bad kane ka dei namar ka jingleit jingwan khlem sangeh jong ki kali heh ne lehse ym shym la shna bha ia ka surok” u la ong.

U Bah Stanly u la ïathuh ruh ba ka Dorbar Shnong, ha ka shithi sha u DC ka la ban jur halor ka jingdonkam kyrkieh ban mang tyngka na ka bynta ban maramot noh mardor ïa ka surok kaba dei ka surok ba donkam tam naka bynta ki paidbah ka thaiñ Brichyrnot.”U DC u la pynthikna ia ka Dorbar Shnong ban ai jingmang tyngka na ka DMF na ka bynta ban maramot ia kane ka surok approach” u la bynrap.