Jurip ka Estimate Committee ka Iingdorbar ia ki jingtei Shillong Smart City Project

Ka Estimate Committee ka Iingdorbar Thaw Ain ka Jylla, hapoh ka jingialam jong u Chairman u Bah Mayralborn Syiem u MLA ka Nongpoh constituency, hynne ka sngi ka la leit jurip ia ki projek ba kongsan kiba la pyntrei lyngba ka Shillong Smart City Project ha kylleng jong ka nongbah SHillong. Ha kane ka jingjurip la iadonlang ki dkhot ka Committee ba kynthup u MLA ka North Shillong u Bah Adelbert Nongrum, u MLA ka Rambrai-Jyrngam u Remington Gabil Momin, u MLA ka Jowai u Bah Wailadmiki Shylla, ka MLA ka Ampati ka Miani D Shira ryngkat bad ki Ophisar ka Assembly Secretariat, ka Tnad Urban Affairs bad ka PWD (Roads). Kane ka Committee ka la leit jurip ia ka jingtei ia ka Iew Laitumkhrah, ha ka jinglut jingsep kaba kot T.28.84 Klur. Kila khmih bniah ruh ia ka jingtei ia ki Smart Roads ha kylleng ki bynta jong ka nongbah, ia kaba la thmu ban pynbha ia ka rukom pyniasoh bad ban pynduna ia ka jingkhapngiah.

Ki la leit ruh ban jurip ia ka jingtei ia ka Office kynthup ia ka Automated Multi-level Car Parking Facility ha Mawkhar, ka projek kaba la pynwandur halor ka jingeh jong ka jingdon jong ki jaka pynieng kali ha Shillong. Kila leit ruh ban jurip ia ka jingtei ia ka Commercial Complex ha Polo ha ka jinglut jingsep kaba kot T.100.33 Klur ia kaba la khmih lynti ba kan noh synniang sha ka ioh ka kot jong ka nongbah. Ha Police Bazar, ka la khmih bniah ia ka jingtei ba T.211 Klur ka Shillong Business-cum-Tourism and Cultural Centre, ka projek kaba la pynwandur ban kyntiew ia ka kam jngohkai bad ia ka kolshor bad la pynkut ia ka jingjurip da kaba leit peit ia ka jaka pynlang ia ka um slap ne ka Rainwater Harvesting Systems kaba la tei ha kylleng ki bynta jong ka nongbah ban tyngkai bad ban pynlang ia ka um.

U Chairman ula pynpaw ia ka jingsngewhun halor ka jingiaid shakhmat jongki jingtei ia ki projek hynrei ula kubur ia ki jingeh kiba la mad da ki tnad kiba pyntreikam ia kine ki projek kynthup ka jingpynkynriah ia ki dukan bad kiwei kiwei, hynrei ki projek ki la iaid ha ka lynti kaba dei ban ai ia ka jingmyntoi kaba khraw ia ki paidbah ka nongbah Shillong. Ula pynpaw ba ki sienjam kiba la shim ha Laitumkhrah bad Mptphran la khmih lynti ba kin nang pynduna ia ka jingkhapngiah bad ban pynbha ia ki jaka pynieng kali bad shen kin sa phah ia ka kaiphod halor ka jinglap bad ki jingai jingmut bad ula pynpaw ia ka jingkyrmen ba kitei ki projek kin poi noh sha u pud ban pyndep noh ia ki ha kaba kin noh synniang na ka bynta ka jingkyntiew ia ka roi ka par jong ka nongbah bad ban shimkhia ia ki jingdonkam jong ki nongshong shnong.