Jurip ka Estimates Committee ka iingdorbar thaw ain ia ka ITI bad Polytechnic ha Nongpoh

Ka Estimates Committee jong ka iing dorbar thawain ka jylla ka la pynlong ia ka jingjurip ha Ri-Bhoi District ha ka 18 tarik Nailar 2025.Ïa kane ka kynhun la ïalam da u bah Mayralborn Syiem, MLA Nongpoh ba long u Chairman ka Committee on Estimates ryngkat ki dkhot ka Committee kynthup bah Wailadmiki Shylla MLA (Jowai), Remington Gabil Momin (Rambrai Jyrngam), Charlest Marngar (Mawhati). U MLA ka Umsning u Dr. Celestine Lyngdoh ula donlang ha ka jingleit jurip ha Umsning.Ha ka jingleit jurip la donlang ki ophisar na tnad PWD, PHE, Meghalaya Legislative Assembly bad kiwei kiwei.

Ka kynhun ka leit jurip ia ka Industrial Training Institute (ITI) ha Nongkhrah, ka Nongpoh Polytechnic bad ia ka ophis u Block Development Officer ba dang shna ha Umsning C&RD Block.Hadien ba la dep ban jurip, u bah Mayralborn Syiem Chairman ka Committee ula ong, “Ngi don ka kabu ban pynlong ïa ka jingjurip lyngba ka Estimates Committee ka Ïingdorbar Thaw Aiñ ka Jylla Meghalaya.Ka jingthmu ba kongsan jong ngi ka long ban buddien ïa ka jingtei ba dang ïaid shakhmat ka ophis u Block Development Officer ha Umsning C&RD Block.Ngi la pynlong ia ka jingpeit bniah ia ka jaka bad ngi la ioh ia ka jingpynshai kaba bniah na ki heh jong ka tnad pynroi paidbah bad nongkyndong. Ka Committee ka la bthah ia u kontraktor ba dei peit ban pyndep ia ka jingtrei hapoh u bnai Nohprah 2025, ka por ba la kular da u kontraktor bad ki heh sorkar.

“Ngi kyrmen da ka jingbuddien man ka por ka jingangnud ka sorkar kan urlong ban pyndep ia baroh ki ophis C&RD Block ha kylleng ka Jylla ha ka por kaba biang bad ka projek kan sa treikam noh shen. Ynda la pyndep kane ka ophis kan ai jingshakri ba kham bha sha ki paidbah, kynthup ïa ki nongsynshar shnong, ki Village Organisation, ki seng trei mon sngewbha bad ki kynhun ïarap ïalade.” ula bynrap.“Mynta ka sngi, ngi la jurip ruh ïa ka jingshna ïa ka ITI kaba dang ïaid shakhmat ha Nongkhrah bad ïa ka Nongpoh Polytechnic, kane ka projek Polytechnic ka ïaid shakhmat bad la khmih lynti ba kan pyndep ha ki bnai ban wan ban ai jingmyntoi ïa ki samla pule lyngba ki jingpule technical bapher bapher.Hynrei ka projek ITI ka mad ia ka jingslem namar ki jingeh kum ka jingshna surok, ka jingpynpoi bording, bad ka jingpynpoi um. Ka Komiti ka la shim khia ïa kine ki jingeh bad kan buddien ïa ki bad ki tnad ba dei peit ban pynthikna ba ka projek kan pyndep kloi katba lah.”Ka Estimates Committee ka la btah ban pyndep ia ka ophis Umsning C&RD Block ha u bnai Nohprah 2025 bad kumjuh ban pynbeit kloi ia ki jingeh ki projek ITI bad Polytechnic ha kaba iadei bad ki jingtei bad ki jingdonkam baroh.