Jurip ki bor District bad u CEO Cantonment, lap bun kiba sah beain ha Lum Survey

Ka Shillong Cantonment hynne ka sngi ka la pyntip ban phah Notice sha baroh ki briew ne ki longïing ba sah beain ha Lum Survey.

Ïa kane la rai la shim hadien ka jingleit jurip lang hapdeng ki bor District ka East Khasi Hills, ki ophisar ka Shillong Cantonment, ki pulit bad u Rangbah Shnong.

Ha kane ka sngi la rai ruh ban pyndait da ki kamera CCTV ha ki katto katne ki jaka ban peitngor ia ki kam bymman bad ia ka iaid ka ïeng ki paidbah.

Haba kren sha ki lad pathai khubor, u Chief Executive Officer (CEO) ka Cantonment, u Ayush Maury ula ong, “Ngi la pynlong ia ka jingiajurip lang. Ngi la ithuh ia baroh ki jaka kiba donkam ban buh ia ki kor ring dur ne CCTV”.

“Ngi la ithuh ki jaka ba ju jia ki kam bymman bad tang katto katne por ngin buh noh ia ki CCTV” ula bynrap.

Ula pyntip ba ki don ki jaka ba ki briew ki la shong iing beain bad ka Board kan sa pyrshang ban leh eiei noh ia kine ki briew.

Haba kylli, u Maury ula ong ba ka Contonment kan leh da kaba tyngeh ia baroh ki jingwan kyntur pud.

“Ngin phah ia ki notice bad ngin sa ujor ejahar pyrshah ia kiba shong be-ain” ula ong bad bynrap “Baroh ki nongshong iing beain kin ioh shuwa ia ka jingmaham ba ki dei ban mih noh. Katkum ka Rehabilitation Act, ngi donkam ban ai katto katne ki jaka bad ngi donkam ban iakren bad ka Sorkar Jylla ba kumno ngin iarap ia ki”.

Ula ong ki la dep ithuh katto katne ki jaka jingpynieng kali. “Ngi donkam ban pyniadon bynta lang bad u SP Traffic bad ngin sa leit jurip halor ki surok”.