Jurip surok u bah Lambor na ka bynta ka jingïaseng samla KJP

U MDC ka Nongkrem Constituency u Bah Lambor Malngiang ryngkat bad ki Nongialam ka Balang Presbyterian, Nongkrem, hynnin ka sngi ki la leit jurip ia ka surok na Iewpynsin, Nongkrem shaduh ka shnong Nongkyndong, Mawpynthih ban ioh shna pynbha noh ia kane ka surok ban pynsuk ia ka leit ka wan jong ki paidbah kiban ia shimbynta ha ka Jingiaseng Samla ka KJP Synod Pdeng, kaban long ha u bnai Rymphang. Kane ka kynhun ha ka jingjurip kaba la iadonlang ki Nongialam ka Nongkrem Dorbar Pyllun bad ki Engineer ka tnad Public Works Department (PWD) kila sakhi ia kane ka surok kala sniew shaba palat pud bad la bun satang ki thliew ki syar, kaba la buh ha ka jingeh bad jingsohsat ia ki kali ba kin iaid na kane ka surok.

Kane ka jingjurip kadei ruh kum ka jingkhmih na ka bynta ka jingpynkhreh ka Balang Presbyterian Nongkrem ban pynlong ia ka Jingiaseng Samla kaba nyngkong eh jong ka Khasi Jaintia Presbyterian Synod Pdeng, kaban long ha ka 28 tarik Rymphang, 1 tarik bad 2 tarik u bnai Lber. Hashuwa ban pynlong ia ka jingjurp, la pynlong shwa ia ka jingialang ha kaba ki bor pyniaid ka Balang kila iamir jingmut bad u Bah Lambor Malngiang ban shna pynbha ia ki surok, ki lynti syngkien, ban pynbiang ia ka umbam umdih, ki jaka ieng kali bad kiwei kiwei ki jingdonkam na ka bynta ban pynlong ia ka Jingiaseng Heh. U Tymmen Basan u Bah Bhalang Lyngdoh uba long ruh u Chairman ka Nongkrem Dorbar Pyllun, ula ong, ka jingdonkam kaba hakhmat eh ka long ban pynbha ia ki surok bad ki lynti syngkien namar ka jingwan jong ki parabangeit na kylleng ki jaka.

U Bah Lambor Malngiang ula kular ban phah maramot noh ia katei ka surok haba pynpaw bad watla ka por ka la long kaba khim bha hynrei yn hap ban maramot na ka bynta ka burom jong baroh lang bad ban pynsuk ia ka leit ka wan jong ki paidbah kiban iashimbynta ha katei ka Jingiaseng Heh. Ula ong, kum u Nongmihkhmat u hap ban shim ia ka jingkitkhlieh ban iada ia ka burom jong ka Constituency bad un sa sei hi ia ka pisa na ka pla lajong ban shna pynbha ia ka surok bad ban pynbiang ruh ia kiwei kiwei ki jingdonkam.