Jurip u Bah Sanbor ia ka surok na Rilbong ban mih sha Jingkieng Umshyrpi

U MLA ka South Shillong Constituency u Bah Sanbor Shullai hynne ka sngi ula leit jurip ia ka jingshna ia ka surok kaba tymmai ne Link Road na Rilbong kaban pyniasoh bad ka Rilbong LP School ban mih syndon shaduh sha ka Jingkieng Umshyrpi da ka jingthmu ban pynsuk ia ka leit ka wan jong ki paidbah ka thaiñ Laban. Ha kane ka jingjurip u Bah Sanbor Shullai la wan ban iadonlang ryngkat ki heh ophisar ka tnad PWD Roads, ki heh Pulit, ki nongialam shnong bad ki nongshong shnong. Kane ka kynhun kala leit ban khmih bad peit bniah ia ka jingiaid shakhmat jong ka kam ban shna ia katei ka surok kaba la sdang na ka jaka kaba don markhap bad ka iingdorbar thawain ka jylla kaba dei jongka Tnad Arts and Culture, ban iaid ruh na sha lyndet jong ka iing dorbar thawain ban poi ha ka jaka kaban pyniasoh bad ka Skul Rilbong bad nangne yn shna biang ia kawei pat ka surok kaban mih shaduh Jingkieng Umshyrpi.

U Bah Sanbor Shullai ula ong ba ka jingshna ia kane ka surok kan long da ka jingthmu ban pynsuk ia ka leit ka wan jong ki paidbah bad khamtam ban weng ia ka jingdheng kali bad ynda lah dep shan ia kane ka surok kan ai jingmyntoi ia ki 8 tylli ki Dorbar Shnong kiba don haka Thain Laban.

 U la iathuh, ba ka jinglut baroh na ka bynta ka jingshna ia kane ka surok bad ka jingkieng ka kot 5.60 klur tyngka bad ka jingtrei mynta ruh kala iaid shakhmat bad ula kyntu ia ka tnad PWD ba kan shimkhia ia kane ka kam ha kaban pynsted ia ki kam ki jam baroh bad la khmih lynti ban pyndep noh ha u bnai Rymphang jong u snem ban wan ia kane ka surok.