Jurip u Conrad ia ka Shillong Medical College Shen yn wan plie u Myntri Rangbahduh u Modi

U Myntri Rangbah ka Jylla Conrad K Sangma hynne ka sngi ula leit jurip ia ka Shillong Medical College ha Pasteur Institute barim kaba don ha Lawmali, Shillong bad pynpaw ka jingkyrmen ba u Myntri Rangbah Duh ka Ri, un wan plie noh shen ia kane ka jaka pule. Ha kane ka sngi la donlang u Myntri ka Koit ka Khiah u Bah Wailadmiki Shylla lem bad ki Heh Ophisar ka tnad ka Koit ka Khiah bad ki nongpyniaid ka College. U Myntri Rangbah ula ioh ruh ban iakren bad ki samla pule jong ka batch banyngkong kane ka medical college. Haba ai jingkren ha ka jingialang, u Myntri Rangbah ula pynpaw ka jingkmen bad ka jingsngewhun halor ka jinglah ban iakynduh bad iakren bad ki samla pule ba nyngkong eh ka college haba bynrap ba ka Shillong Medical College ka dei ka jaka pule ba kongsan bha ha ka Jylla Meghalaya.

“Nga don ka jingkyrmen ba ia kane ka jaka pule un sa wan plie shen da u Myntri Rangbah Duh ka ri hynrei katba ngi dang ap ia ka jingplie, ngam kwah ban ap ha ka ban iakynduh ia ki nonghikai bad ki samla pule” ula ong. Ula pynpaw ruh ba ka Shillong Medical College ka dei ka project kaba eh bha ia ka Jylla bad pynpaw ia ka jingsngew nguh ia ka Myntri barim ka Koit ka Khiah Kong Ampareen Lyngdoh bad ki Ophisar ka Tnad ka Koit ka Khiah kiba la shimkhia bad aiti lut ialade ban pynwandur ia kane ka college. “Kin dang don shibun ki jingeh hakhmat jong ngi bad ki kam kiba donkamban leh, hynrei ngi la iengskhem ha ka jingkut jingmut jong ngi ban kyntiew ia ka JYlla” ula ong. “Nga ai khublei ruh ia ka jingshakri jong ki Doktor kiba la shah jied ban long shibynta jong kane ka medical college bad ruh ia ka jingshemphang jong ki bad ka jingbtin lynti” ula ong.

Haba kren sha ki samla pule ula ong ba ka dei ka khyllipmat ban sah jingkynmaw namar yn kynmaw ia ki kum ki samla pule ba nyngkong eh ka Shillong Medical College haba bynrap “Phi dei ruh phin long kiba kham kongsan, ban buh ia ki kyndon na ka bynta ki samla pule hadien habud bad ka don ka jingkhmih lynti kaba khraw bha na phi baroh”. U Conrad ula kyntu ruh ia ki samla pule ba kim dei ban duh mynsiem ha kaban iakynduh ia ki jingeh bad ong “Haba wan kiei kiei kiba thymmai, kin don beit ki jingeh hynrei nga kular ha phi ba ngi don hangne ban kyrshan ia phi” ula ong. Hadien kane, u Myntri Rangbah ula lum ia ka jingialang ban iathir bad ki samla pule lem bad ki nonghikai kiba la pyntip ia kaei ka jingshem jong ki.