Jurip u MLA bad ki ophisar PWD ia ka surok Nongpoh-Sonapur, kyrmen yn pyndep ha ka por ba la buh

Ban pyntikna ba ka jingtrei ia u surok Nongpoh – Umden-Sonapur (NUS) ba 20 kilometres eiei kan long kaba iaid beit iaid ryntih, u MLA ka Nongpoh Constituency u Bah Mayral Born Syiem mynta ka 1 tarik Jymmang lem bad ki ophisar ba kynthup ia u BDO, ki ophisar ka tnad PWD bad kiwei kiwei ki la leit ban jurip ia baroh shilynter jong u tei u surok.

U surok NUS ba 20 Kilometres ba la mang pisa ha ka jinglut kaban kot kumba 49.53 klur ban tei ruh ha ka jingiar katkum ka 5.5 intermediate size, la wan ban buh mawnongrim da u Bah Prestone Tynsong, Symbut Myntri Rangbah ka jylla ha ka 10 tarik Nohprah ha kaba la sakhi pat ia ka jingsdang ki kam ban pyntrei shaid shaid ia u ne u surok.

U Bah Mayral Born Syiem, hadien ba la dep ban jurip ia ka jingsdang ban pyntrei ia u surok NUS, u la pynpaw ia ka jingsngewkmen kaba khraw ban sakhi ba ka jingtrei ka la sdang ban pynidak kaba la wanrah ruh ia ka jingphuh mut phuhmat ia ki nongshong shnong ka thaiñ Umden bad ia ki nongleit nongwan lyngba u ne u surok.

“Nga ai khublei kyrpang ia ka sorkar jylla, kaba la sngap ia ka jingud jingnam bad ban phaikhmat sha ka jingeh ba la mad da ki paidbah mynta da ki phew snem namar ka jingsniew ba palat liam jong u tei u surok NUS, ha kaba kum u nongmihkhmat paidbah u la iai pynsngew ia kane ka mat sha ka sorkar la bun tylli ki snem bad kane ka jingpynmang pisa kyrpang ban tei noh ia u surok thymmai, ka long kaei kaei kaba ki paidbah nongshong shnong lem bad ki nongleit nongwan kin dap da ka jingkmen kaba khraw bad ka jingmyntoi shikatdei ia ki”, ong u Bah Syiem.

U la iathuh, ba ha kane ka jingtei ia u surok, ki don bun ki jaka kiba hap ban pynheh ia ka bynta u surok bad kin don ruh shibun ki jingeh, hynrei lada ki paidbah ki ai ka jingiatreilang ka jingtei ia u ne u surok kan long kaba iaid beit iaid ryntih bad ban ioh pyndep ruh ha ka por kaba biang kumba la buh.

La synranlang ha kane ka jingjurip ia u tei u surok NUS, da u Bah Erick Kevin Dkhar, BDO ka Umling C&RD Block, ki ophisar ka tnad PWD Roads ba kynthup ia u Executive Engineer Bah J. Lyndem, Bah A Karpan Asst. EE, Bah D Shylla AEE, Bah R Warjri Jr. Engineer nalor kiwei kiwei.