Ka America ka riewspah ba stad ki nongshong shnong: Prestone

U Symbud Myntri Rangbah ka Jylla u Bah Prestone Tynsong uba long ruh u MLA ka Pynursla Constituency hynne ka sngi, ula pynhap pyrda noh ia ka jingrakhe ia ka Jubili Rupa ne jingdap 25 snem jong ka Little Star School ha ka shnong Umkor, Pynursla. Ha kane ka jingrakhe u Bah Prestone Tynsong ula pyllait paidbah ia ka kot sah kynmaw ne Sovenir jong kane ka jingrakhe ia ka Jubili Rupa ha kaba la iadonlang u Bah Rahbok Tynsong, ki nongpyniaid jong ka skul, ki nongialam shnong bad kiwei kiwei bad ula pynhiar ruh ia ka lama kum ka dak jong ka pynhap pyrda noh ia kane ka jingrakhe.

Haba kren ha ka jingialang, ula pynpaw ia ka jingkmen ban iadon bynta lang ha kane ka jingrakhe bad ula iaroh ia ki nongpyniaid kiba la seng ia kane ka skul ha u snem 2000 ban ai ia ka jingnang jingstad ia ki khynnah ka thain Pynursla bad ula kyntu ia ki nonghikai bad ia ki khynnah skul ba kin bteng ban trei shitom khnang ba shisien ka sngi kane ka skul kan poi sha ka kyrdan kaba shajrong. U Symbud Myntri Rangbah ula pynbna ban ai T.8 Lak khnang ba ka skul kan ioh tei pyndep ia ka iingskul bad ula ong ruh ba ha u snem ban wan, yn sa shimkhia bad ki bor pyniaid jong ka skul ban kyntiew ia kane ka skul da kaba pynioh ia ki kor ki bor Computer ban pyndonkam ha ka jingpule ka jongki kaba man la ka sngi.

U Bah Prestone ula ong, ba ka ri America ka dei ka ri kaba riewspah bad kaba khlain tam ha ka pyrthei bad ka daw ka long ba ka don ki nongshong shnong kiba la nang la stad lut bad ula kyntu ia ki khynnah skul ba ki dei ban leh bha ia la ki kmie ki kpa da kaba leh bha ha ka jingpule ka jongki. Ia ka prokram la pynphuh pynphieng da ki jingrwai bad jingshad na ki khynnah skul ba mynta bad ba rim.