Ka aniversary mynta u snem ka kyrsiew iaki mynsiem bad pynkynmaw kiei ba dei ban leh: President Unitarian Union

Ka 18 tarik u bnai September dei ka sngi ba khraw ha ki paid riewngeit jong ka Balang Unitarian kiba don ha Ri Khasi Jaiñtia bad Karbi namar ba ha kane ka sngi manla u snem kila kynmaw burom iaka sngi sdang jong ka Balang bala seng da u Babu Hajom Kissor Singh Nongbri kata ka long ha u snem 1887, bad mynta u snem ka Balang Unitarian kala khynjoh sha u snem ba 138 ka jingiaid lynti. Bad kumba ka Balang Unitarian ha Jowai dei ka sengkmie, ka jinglehkmen kynmaw burom ia kane ka tyngkhuh dap snem ruh ka long kaba shongkun daka jingshim bynta shitrhem ki paid riewngeit naduh ka jingiaseng step, jingiaseng sngi kumjuh haka por janmiet ba ki paidbah ki shim bynta haka jingiaiaid prosession da kaba rah lang ruh ki dongmusa ki bannar ryngkat ki jingiarwai lynter lynti.

U President ka senglang Unitarian ha Ri Khasi Jaiñtia bad Karbi, u Marki Passah, u ong kane dei ka sngi kaba khraw tam haki kum ki paid bangeit bad ka jingwan ka aniversary ka pynkynmaw ia kiei kiei kiba dei ban leh kum kiba ngeit katba dang im ha sla pyrthei. U iathuh ruh ba mynta u snem ka senglang kala pynbeit ban don kajuh ka phang pdeng ha baroh lang kaba ong “ka Aniversary ka Jingkyrsiew Mynsiem”. Lyngba kane ka phang pdeng kila pynsngewthuh shaki para bangeit halor ka jinghikai niam bad ka aniversary mynta u snem ka kyrsiew iaki mynsiem, namar haka jinglong briew bunsien ym lah biang bad ym lah ban pyndep iaki jingphla niam.

Haba iadei bad ka jingiaid procession ha kylleng ki bynta ka shong Jowai u ong kane ka dei shi bynta ban pyni shaka pyrthei iaki nongrim jingngeit jong ki, ba kum kiba ngeit ha kane ka sngi kila ioh iaki jingshai mynsiem kaba la ioh 138 snem mynshwa.