Ka Apollo Hospital kan pynduna ia ki nongpang ban leit sumar shabar Jylla: Conrad

U Myntri Rangbah ka Jylla u Conrad K Sangma hynne ka sngi ula plie paidbah ia ka Apollo Trinity Medical Centre ha nongbah Shillong ha ka jingdonlang ka Myntri ka koit ka khiah, ka Dr M Ampareen Lyngdoh, u Chief Secretary (CS) ka Jylla u Bah DP Wahlang bad u Regional CEO East jong ka Apollo Hospital Enterprise Limited u Rana Dasgupta.Ia kane ka Health Center la plie ha ka jingiatreilang bad ka Apollo Hospital Enterprise Limited. Haba kren ha jingialang u Myntri Rangbah ka Jylla, u Conrad K Sangma ula pynpaw ka jingsngew sarong ban sakhi ïa ka jingpyndep ïa ka Apollo Trinity Medical Centre. U Conrad ula ban jur ia ka jingangnud ka Sorkar Jylla ban pynbiang ki lad jingshakri ha ka koit ka khiah, da kaba pynpaw ka Meghalaya ka pynlut haduh 9% na ka mang tyngka ha koit ka khiah bad ka dei ruh kaba heh tam ha ka Ri. Ula kubur ïa ka jingdonkam ban ïoh ki jingshakri ba kham bha ban wad bniah ïa ki jingpang bad pynpaw ïa ka jingkyrmen ba ka Apollo Hospital jaka sumar thymmai kan ïarap ban pynduna ïa ka jinglut jingsep ia ki nongshong shnong ba ju leit shah sumar shabar ka Jylla.“Ka koit ka khiah kaba kongsan tam na bynta ka Sorkar jong ngi khamtam ha ki thain nongkyndong haduh ki jingtei ia ki jaka suamr ngi la kiew bha. Kane ka jaka kan pyndap ïa kiba bun ki jingduna ha ka rukom sumar bad kan wanrah ïa ka jingsumar ba biang ia ki paidbah” la ong u Conrad.

U la bynrap shaphang ki jingthmu ban pynbha ia ka koit ka khiah ha ka Jylla, ka don ka jingthmu ban pynrung kam ia ki 500 ngut ki doktor, ban pyndonkam da ki bor Solar ha ki sub-center bad ka jingpynlong digital ia ki kot ki sla jong ki nongpang. Ula ban jur ia ka jingdonkam ban wad bniah ia ki jingpang bad ban sumar ia ki nongpang bad kyntu ia ki nongtrei ha katei ka jaka sumar ban pynthikna ia ka jingshakri ryngkat ka jingsngewrit.U Myntri Rangbah ula kubur ruh ïa ki jingeh ban pynneh ïa ka mariang ha ka nongbah Shillong bad kular ban kyrshan pynbha ïa ki jingtei, kynthup ka jingpynkhuid ïa ki nala bad ban pynitynnad ïa ka nongbah Shillong.Ha ka jingkren ka myntri ka tnat ka koit ka khiah, ka Dr Ampareen Lyngdoh ka la pynkynmaw ba ka jaka ba shna ia ka Apollo Trinity Medical Centre mynshwa ka dei ka jaka ialehkai bad mynta ka la kylla ka jaka sumar.Ka Dr Ampareen ka la ban jur ia ka jingdonkam kane ka jaka sumar namar ka jinglut ka long kaba heh ban leit sumar shabar Jylla bad ka long ka jingkit bakhia ha ka liang ka pisa tyngka ia kiba bun ki longïing. Ka la ong kane ka jaka kan ai jingkyrmen ïa kito kiba donkam jingïarap ia ki paidbah bad kan pynthikna ki jingsumar ba paka ki don hapoh ka Meghalaya.

Ka Dr Ampareen ka la kren halor ka jingktah ka ioh ka kot ka jinglut jingsep ha ka koit ka khiah, da kaba kdew ba bun ki nongshong shnong khamtam kito kiba duna ha ka ioh ka kot, bun sien ki hap ban die noh ka jaka ne ki mar ban siew bai sumar pang shabar ka jylla. Ka la bynrap ba ka jingdonkam ban don ka jaka sumar ba ha khlieh duh hapoh ka nongbah Shillong kan weng ia kine ki jingeh ha ka liang ka pisa tyngka.Nalor kane, ka la kyntu ïa ki bor synshar shnong bad ki nongïalam paidbah ban ïatreilang ban kyrshan ïa kane ka jaka sumar bad ka sorkar ka donkam ka jingïatreilang hapdeng ki bor Sorkar bad ki riew shimet bad ban ai jingmut ïa ka jaka sumar ba bun jait hapoh ka Apollo Trinity Medical Centre ban ïarap ïa kiba nongpang ba shitom. Katba u Chief Secretary ka Jylla u Bah DP Wahlang ha ka jingkren la pynpaw ïa ka jingïohi jngai shaphang ka jingpawnam jong ka nongbah Shillong kum ka jaka ai jingsumar ha kaba sdang jong ka 20 Century bad u la kyntu ïa baroh ki nongshim bynta ban pynneh ïa ka rukom ai jingsumar bad ban pynthikna ba ka Apollo Trinity Medical Centre kan ai jingshakri kyrpang ia ki lad jingsumar ha ka jylla Meghalaya. U Rana Dasgupta, Regional CEO – East, Apollo Hospitals Enterprise Limited, ula ong ba ka Apollo ka ai ka jingsumar kaba ia ryngkat kyrdan bad ka pyrthei ha Meghalaya.

U Dasgupta ula pynpaw ka jingpyrkhat jong u Apollo halor ki jingpang bym lah ban saphriang (NCDs) bad ka jingdonkam ban lap kloi ïa ka jingpang bad ula pynksan ïa ka jingsumar ba pynshong nongrim ha ki nongpang, ki rukom wad bniah ban lap kloi ïa ka jingpang bad ka jingsumar ba biang kat um ka jingthmu jong ka center. Ka Apollo Trinity Medical Centre ka dei kaba don ki tiar sumar ba kham tbit kynthup ka diagnostic services, ECG, TMT, echocardiography, pulmonary function tests (PFT), ultrasound, X-ray, ophthalmology, physiotherapy bad kiwei kaba treikam lang bad ka Apollo Diagnostics. Ka tnad Radiology ka don ka jingiasoh bad ka Apollo TeleRadiology International, kaba pynthikna ia ka jingiasyllok bad ki kaiphod jong ki riew shemphang. Ka bynta ba ar ka jingpynheh, yn pynrung ia ki jingshakri ban sumar kum ka dialysis, endoscopy, CT scans bad MRI. Yn pynmih ruh ia ka App ba kyrpang na bynta ki nongpang ban buh por kynduh ne Appointment Booking bad Home Sample Collection.Kane Center kan don ka jingiasyllok lane ka Telemedicine Consultation bad ki stad ka Apollo na Chennai, Hyderabad, Delhi, Kolkata bad Guwahati.