Ka bai wai jaka bad khajna kam dei ban iapher hapdeng ka Cantonment bad Municipal: Sanbor Shullai

U MLA ka BJP uba dei u Myntri sorkar u bah Sanbor Shullai ula pynpaw ia ka jingsngewkhia halor ka jingkiew palat ka bai wai jaka hapoh ka thain jong ka Shillong Cantonment Area.Ula buh jingkylli halor ka jingpynkhein ia ka hok ban iaryngkat ne ka right to equality namar ba haba nujor bad ki jaka kiba marjan bad ka Cantonment ka bai wai ka iapher.U bah Sanbor ula ong ba ka bai wai jaka kam dei ban iapher bad kam lah ban don ar tylli ka rukom khrong khajna na bynta ki jaka ha cantonment bad ki jaka ha thain Municipal area.Dang shen u bah Sanbor ula ialam ia ki nongialam ka kynhun BJP sha New Delhi ban iakynduh ia u Myntri ka tnad Defence (State) u Sanjay Seth bad ka Shoba Gupta ka Director General jong ka Defence Estate.Ha kane ka jingiakynduh u bah Sanbor ula aiti ia ka jingthoh halor ka jingkiew jubor ka khajna ha ki jaka ha Cantonment kaba la mih hadien ba la pyntreikam ia ka policy kaba shipor (Interim Policy).

Ha ka jingthoh ba ula aiti, u bah Sanbor ula kyntu ia ka tnad ba kadei ban pynkylla ia ka policy ba shipor bad ban pyntreikam da 25%  na ka STR ba la buh ia ki nongshim wai jaka.Ula ong ba ka jingkiew palat ka bai wai jaka, ka la poi sha ka mukotduma bad bun ki kam ki dang sahteng bad ka iing kashari ka Supreme Court bad ha ki Iingbishar jong ka High court bapher bapher ha kane ka ri.Ula dawa ba ka sorkar kadei ban thaw da ka polisi kaba bniah, khnang ba ka bai wai kan iaryngkat kumjuh bad kiwei ki jaka ba marjan jong ka Municipal area.Ka kynhun BJP ha kane ka jingiakyduh ia ka Director, kila kyntu ba dei ban pynsted ban pyntreikam ia ka ain shna iing ka building bye laws bad ban pynsted ban bhah na bynta ban shna ia ka jaka pyllang um kaba lah ban buh um haduh 6 lak litre na bynta ban pynbiang ia ki jingdonkam jong ka thain Shillong cantonment area.

Ha kajuh ka por u bah Sanbor ula khot sngewbha ia u Myntri ka tnad Defense (State) ban wan buh ia u maw nongrim na bynta kiban bun ki projek kiban sa pyntrei.Na ka liang u Myntri ka tnad defence ula long uba kloi ban wan jngoh sha Shillong ha u bnai Rymphang. Ula bynrap ba ka kynhun BJP shen kan sa leit ban iakynduh ia u Myntri Rangbahduh ka ri na bynta ban pynsted ban pyntreikam ia ki polisi.