Ka dei ka jingleh politik, kyntait u Bah Sniawbhalang ia ka jingkynnoh ka HNLC

U Symbud Myntri Rangbah ka Jylla u Bah Sniawbhalang Dhar ula kyntait ia ka jingkynnoh bei tyngka ia ka seng kieng atiar ka Hynniewtrep National Liberation Council (HNLC). Haba kyntait ia ka jingkynnoh u Bah Sniawbhalang ba kane ka jingkynnoh ka dei tang ka buit Politik ban pynthoh bria bad ban pynjah burom ia u. Lah ban kdew ba dang shen ka HNLC ka la kynnoh ba u Symbud Myntri Rangbah u bei tyngka ia ka seng kiengatiar ha ka por ba u long Myntri hapoh ka Sorkar ba ialam da ka Congress. Haba kren sha ki lad pathai khubor u Bah Sniawbhalang ula ong “Sngewsih, ba ngam shym la don ha Jylla la katto katne taiew. Ka jingkynnoh jong ka HNLC ka dei kaba shu thok bad kaba khlem nongrim. Ka jingkynnoh ka dei tang ka buit Politik tang ban pynthoh bria ia nga”.

U Bah Sniawbhalang ula ong ba ka HNLC ka dei ka seng ba shah khein beain bad la 17 snem tam ba u long MLA, um ju tip bad um ju don bynta bad kane ka seng. “Phi tip bha kane ka seng ka ju pynsaphriang ia ki khubor thok man ka por. Ngi hap ban peit bha la ka dei ka kam kaba khia ne em, ngin sa ia peit hynrei ka dei ka jingkynnoh ba khlem nongrim bad baroh ki long kiba bakla” u la ong. Haba kylli halor ka jingdawa ka Indian National Congress bad ka Voice of the People Party (VPP) ban weng noh ia u na ka shuki Symbud Myntri Rangbah, u Bah Sniawbhalang ula ong “Ngam pat long satia uba kloi ban iehnoh ia ka shuki Symbud Myntri Rangbah ka Jylla namar ka jingkynnoh jong ka kynhun ba la khein be-ain ka dei ka bym don nongrim”.

U Symbud Myntri Rangbah ula ong, ba ka dei ka kamram jong ki (Liangpyrshah) ban dawa weng na ka shuki hynrei ki dei ban kynmaw, haba ki dawa ki dei ruh ban don ia ki sakhi sabut ba pura.  “Sngewbha kynmaw, katba ki dang kwah ban pynphriang khubor sniew pyrshah ia nga, u Blei un nang kyrkhu ia nga, ia ka Party jong nga bad ia ka Sorkar namar nga don hangne ban shakri naduh ka mynsiem ia ki paidbah. Ngi don hangne ban iada ia ki paidbah, ka Jylla bad ka Ri baroh kawei. Ngi dei ki nongialam jong phi, sngewbha shaniah ia ngi namar baroh kine ki dei ki jingkynnoh ba khlem nongrim” u la ong.