Ka Dorbar Mang Tyngka naduh 27 tarik Rymphang: BAC

Ka Business Advisory Committee (BAC) ka Meghalaya Legislative Assembly ba long hynne ka sngi, ka la rai ba ka Dorbar Mang Tyngka ka ïingdorbar thawaiñ ka jylla kan sdang naduh ka 16 tarik haduh ka 27 tarik u Rymphang.

Ia ka jingialang la pyniaid da u Lamphang ka ïing dorbar thawaiñ ka jylla u Thomas A. Sangma bad shim bynta da u Symbud Myntri Rangbah ka jylla ba khmih ia ka tnad Parliamentary Affairs u Bah Prestone Tynsong, u Nongialam ka Liang Pyrshah u Dr. Mukul Sangma, u Bah Paul Lyngdoh u la iashim bynta lyngba ki kor digital.

Ha ka jingialang la donlang ruh ki ophisar kynthup u Bah Cyril V. Darlong Diengdoh u Commissioner & Secretary ka Parliamentary Affairs Department, u Dr. Andrew Simons, Commissioner & Secretary ka Meghalaya Legislative Assembly bad u Malthus S. Sangma, Secretary ka Meghalaya Legislative Assembly.

U Lamphang ula pyntip ha kane ka Dorbar ba shiphew sngi kan kynthup 7 sngi ia ka Government Business ne ki kam ba ia dei bad ka Sorkar Jylla bad 3 sngi ka Private Members’ Business ne ki kam shimet ba wanrah da ki MLA bad ula pyntip ba ia ka Mang Tyngka yn wanrah ha ka 20 tarik u Rymphang, 2026.

U Lamphang ula pyntip ba lah ban pynjlan ia ka jingiashong dorbar lada donkam, ban ailad ia ki dkhot ba kin ioh ban iashim bynta ha ka jingpyniaid ia ki kam jong ka dorbar.

Ula pyntip ha ka sngi ba wanrah ia ki Supplementary Demand for Grants, ka dorbar lah ban pynjlan haduh 3 baje janmiet.