Ka ‘Humediam One-Stop’ ka dukan die doh bakhuid ha Jaintia

Uwei u Rangbah la ithuh kyrteng u bah Heipormi Laloo na ka shnong Mowkaiaw, West Jaiñtia Hills District ula plie ia ka ïingot doh ha Ialong hajan Toll Gate bad ka dukan die doh ha Soomer Mihmyntdu hajan ka surok lad By pass ba kyrteng Humediam One-Stop, Meat Shop, Fresh, Hygienic, Fine Cut.

U la pynpaw ka jingkmen ia ka jingangnud ban wanrah ka rukom otdoh kaba khuid bad ruh ban die ha ka dukan khnang ban ym ktah ia ka koit ka khiah ki paidbah nongbam.

Ia kane ka ïing ot doh bad dukan die doh la plie mynta ka 18/12/2025 da u Dr. Mihsalan Lamare, District A.H. and Veterinary Officer, East Jaintia Hills, Khliehriat, ryngkat ka jingdonlang u Rev. D.S. Laloo, Rev R Laloo nalor kiwei pat ki riew ryngbah bad kiba haiing hasem jong u.

Haba iakren bad u Heipormi Laloo uiathuh ba ia kane ka kam ula lah ban pynurlong da ka jingiarap kyrshan pisa ka “Prime Meghalaya” kaba la kyrshan ia u 10 lak tyngka ba un sdang ia kane ka kam. Hynrei namar ba u plie ruh iaka dukan kumta iaka jinglut u hap ban pyndap nalade hi ruh.

Ha ka jingiaid lynti ia kane ka kam u iathuh ba ula iamir jingmut ruh bad ki Doctor veterinary kumjuh ki scientist napoh ICAR kiba la pynshlur bad ai jinghikai ia u kumno ban trei bad pynjanai ia kane ka kam.

Kumba long mynta ha kane ka ïing u shoh tang iaka doh sniang bad dohsyiar bad katba lah u pyrshang ban shim da kiba la ri ha kane hi ka thaiñ, bad ka rukom shoh ruh ula leh da kaba khuid suba nalor ba u pyndonkam ruh ki kor ki bor katkum ka juk jingstad mynta.

Katba ha ka dukan pat u die ruh iaka dohkha kaba u shim nabar da kaba ialeh ban pynkhuid shwa iaka.

Iaki lai jait ki doh ba u die ha kane ka dukan ruh ula sumar bad buh bha iaki hapoh ka duli ba kyrpang kaba don iaka jingdaithat khnang ban neh slem ka jingbha ka jinglong jingman ka doh.

U Dr. Mihsalan Lamare, District A.H. and Veterinary Officer kum u kongsan ba wan plie ia kane ka ïing shoh doh kumjuh iaka dukan, u ai jingiaroh halor ka jingshim u Heipormi Laloo ia kane ka kam kaba khampher bad u khmih lynti ruh kumba ula leit wad jingmut naki riew shemphang shwa ban iaid ia kane ka kam un bud ryntih ruh katkum ki kyndon bala buh.

U ong ruh kane ka ïing shoh doh bad ka dukan die doh kaba kum kane dei kaba nyngkong tam ha Rilum Jaiñtia kaban pyntikna iaka khuid ka suba bad ruh ka jingshngaiñ iaki nongbam.

U kyrmen ruh ba kane ka kam une u ryngbah kan nangkiew shaphrang khang ba un nanglah ai kam shuh shuh ia kiwei.