Ka IFFCO ka pdiang sngewbha ia ka jingpynbna jong ka Tribhuvan Sahkari University Bill

Ka IFFCO ka pdiang sngewbha ia ka jingpynbna jong ka Tribhuvan Sahkari University Bill, 2025 ha iing dorbar thawain Lok Sabha bad kumjuh ruh ia ka jingioh jingmynjur na ka iing dorbar thawain Rajya Sabha ha ka 26 tarik U Lber 2025. Ha ka por ba pynbna ia ka Bill u myntri ka tnad Cooperation bad Home Affairs ka sorkar pdeng U Amit Shah u ong ba hadien 75 snem jong ka jingioh laitluid, mynta ka ri ka la ioh ia la ka jong ka Cooperative University kaba nyngkong. U la ong ba kane ka bill kan nang pynkhlain shuh shuh ia ka ioh ka kot ki jaka  kyndong, kan wanrah ia ki lad ki lynti ban long ki briew kiba lah ban trei kam lajong bad long ki nongseng kam lajong barit, kan wanrah ruh ia ka jingkynthup lang ia baroh ki nongshong shong bad kan nang kyntiew ia ki lad ki kabu na ka bynta ki jingwad bniah ia ki lad bad ki buit treikam thymmai. U la ong ba lada ka long kumno, baroh kawei ka ri kan ioh ia ki nongialam cooperative kiba la ioh mynsiem da ka mynsiem jong ka jingiatreilang bad ryngkat ka jingstad.  U Dr. Udai Shanker Awasthi, Managing Director, ka IFFCO u ong, “Nga iaroh ia ka Tribhuvan Cooperative University Bill 2025, kaba long ka sienjam ban sah kynmaw namar ka jingkdew lynti ban kyntiew ia ki kam cooperative. Ka jingbuh ia kane ka skulbah kan iarap ban thaw ia ki lad ki lynti sha ka jingkylla kaba thymmai ha kaba iadei bad ki kam cooperative. Nga pdiang sngewbha ia kane ka sienjam kaba radbah jong u myntri rangbah duh ka ri U Narendra Modi bad u myntri ka tnad ki kam pohiing bad kumjuh ruh ia u myntri ka tnad ki kam Cooperative U Amit Shah. Kane kadei ka sienjam kaba khraw na ka bynta ki kam rep kam riang ka India, ki nongrep bad ban kyntire ia ki kam ha ki jaka bad ki thain nongkyndong. Kane kan pynkhlain shuh shuh ia ki nong kyndong jong ngi.”

U la ong, ka jingbuh ia ki skul kiba kyrpang na ka bynta ki kam bapher bapher ha ka r ikan iarap ia ki cooperative shna sboh khamtam ka IFFCO, kane kan nang pynkupbor ia ki cooperative da kaba lah ban mih ki briew kiba tbit ha ki kam ban pyniaid ia ki cooperative shna sboh bad ban pyniaid iew ruh kumjuh. Ki jingpule ba lyngkot na ka bynta ki nongtrei cooperative kiba la don lypa kan wanrah jingkylla shibun bad kan long kum u mawjam ba ym pat ju leh ha kane ka rukom mynno mynno ruh. Kane ka skulbah kan iarap ban ai jinghikai ruh ia ki nongtrei kiba la don lypa bad kito kiba la don ha ki kam cooperative bad pynlong ia ki ba kin nang kham janai shuh shuh bad long ka jingmyntoi kaba khraw sha ka kam.  Haba pynpaw ia ka jingiaroh namar kanr ka sienjam U Dileep Sanghani, Chairman, IFFCO u ong, kane ka sienjam kan pyntikna ba ka lawei jong ki nongialam ha ki kam cooperative yn lah ban pynsan bha bad sumar bha hapoh kane ka rukom treikam kaba la pyniaid da ka cooperative na ka bynta ka cooperative. U la pynpaw ia ka jingsngew nguh jong u sha u Myntri Rangbah duh ka ri U Narendra Modi ba hapoh ka jingbtin lynti jong u, U Amit Shah, u myntri ka tnad Cooperation ba nyngkong u la trei khlem shong thait hapoh ka motto ne ka phang ‘Sahkar se Samriddhi’. U la ong kane kadei ka sienjam kaban sah kynmaw bad thaw history kaban pyntikna ban don ka jingroi jong ka kam cooperative ha ki snem ban wan. 

Haba dei bad ka jingkyntiew ia ka roi ka par bad ka jingpyniar ia ki kam cooperative, donkam ban ioh ia ki briew kiba la shah hikai pyntbit bha bad ka Skulbah Tribhuvan Sahkari University kan trei na ka bynta ban pynurlonh ia kane ka jingdonkam. Hadien ba la seng ia ka cooperative university, kito kiba la pyndep ia ka jingpule diploma bad degree kin ioh kam. Lyngba kane ka skulbah, kin wan ki jingnoh synniang kiba heh sha ka rukom pyniaid ia ki mar ki mata ha la ka jong ka ri bad kumjuh ruh sha bar ri. Ka rukom treikam ba thymmai ha kaba iadei bad ka cooperative kan sdang na kane ka skulbah kaban pynmih ia ki briew kiba tbit ki ban trei ia ka kam. Yn wanrah ia ki jingpule kiba bianf na ka bynta kane ka skulbah hapoh ka jingialam jong ka tnad Ministry of Cooperation ryngkat ka jingiaphylliew jingmut bad ki cooperatives ha kylleng ka ri.