Ka ilekshon MDC ka dei ka Semifinal

U Nongialam ka Voice of the People Party (VPP) u bah Ardent Miller Basaiawmoit ula ong ba ka ilekshon MDC ka KHADC bad ka JHADC kan long kum ka semi phainal bad ka MLA kan long kum ka phainal ha kaba ka party kan sa ioh ban kurup ia ka jingsynshar ha ka jylla. Haba kren ha ka jingialang paidbah ba long ha Smit u bah Ardent ula kam ruh ba ka party hadien ka ilekshon MDC ka ban long la shem snem, kan sa ioh ban ialam ban synshar ha baroh ar tylli ki Atonomous District Council. U bah Ardent ula ong,“Ka ilekshon ka KHADC bad ka JHADC kan long kum ka semi phainal bad ka MLA kan long kum ka phainal ban kurup ia ka jingsynshar ha ka jylla.”    

Ula ong ba ha ka MDC ilekshon, ka jingkyrshan ki paidbah ia ka party ka dei ban long 70 percent na ka 100 namar ba ha ka MP ka la ioh 55 percent ka jingdon ki nongthep vote. “Ka VPP kan synshar ha ka KHADC bad ka JHADC hadien ka elekshon ban sa long shen bad ka party kan trei shitom ha ka MLA ilekshon ha 2028 bad kane dei ruh ka phainal ban kurup ia ka bor synshar ha ka jylla,” ong u nongialam ka VPP u bah Ardent. Ula ong ba lada ha ka MDC ki lah ban ioh 70 percent, khlem pep, kumba 10-15 ngut ki MLA yn ioh tang na Garo Hills ha ka elekshon ban wan.

Ha kajuh ka por u bah Ardent ula ong ba ki don bun ruh kiba pyrshang ban pynsngewthuh bakla ba ka party ka la don hapdeng ka jingiapait iapra, hynrei ula pynshai ba hapoh ka party VPP haduh mynta kam shym la don kano kano ka jingiapait bad ka dang long tylli mlon kawei.