U Myntri Rangbahduh ka Ri u Narendra Modi ula phah shithi sha u Myntri Rangbah ka Jylla Meghalaya u Conrad K Sangma ban pynpaw ka jingsngewnguh halor ka jingai sngewbha da ka Jaiñ Ryndia bad ula ong ba kane ka dei ka shap jong ka jingriewspah ka Jylla ha ki jingdon jingem barim bad ka jingsarong. U Myntri Rangbahduh ka Ri ula pynpaw ia ka jinglong kongsan ia kane ka jingai sngewbha bad bynrap ba ka don ka jingdawa kaba jur ha ka pyrthei baroh kawei ia ki mar kiba iai neh bad kiba la pynmih tynrai kum ka jaiñ Ryndia. “Ka rukom pyrkhat ka jong phi ka long kaba ktah bha bad ka long kaei kaei kaba dei ban ai jingiaroh” la ong u Modi ha ka shithi kaba la phah sha u Conrad Sangma bad ula pynpaw ruh ba ka jaiñ Ryndia ka ieng kum kata ka bym ktah than ia ka mei mariang bad kadei ka rukom pynmih tynrai.
Nalor kane ula kdew ruh ba ka jingai dang shen ia ka shap Geographical Indication (GI) ia ka Jaiñ Ryndia, kadei ka lynti ban iaid shakhmat ha kaban kyntiew ia kane ka mar kaba la pynmih tynrai da ki paid riewlum ha ki rynsan jong ka pyrthei.U Modi ula pynkynmaw ruh ia ka jingwan jngoh ka jongu ia ka jylla Meghalaya, ula iaroh ia ka rukom long ki briew, ka jingitynnad jong ka Jylla bad ia ka jingtbit jong ki samla bad ula ong ba da ka jingiatreilang ryngkat yn iai bteng ban shakri ia ki paidbah ka jylla bad ban pynthikna ba ka Meghalaya kan leh ia ka bynta kaba khraw ha kaban thaw ia ka Viksit Bharat.
Halor kane ka jingioh pdiang ia ka shithi na u Modi, na ka liang u Myntri Rangbah ka jylla u Conrad K Sangma ula thoh ha ka rynsan X ha kaba ula pynpaw ia ka jingsngewnguh ia u Myntri Ragbahduh ka ri u Narendra Modi halor ka jingithuh ia ka ‘Ryndia’, ka jingioh ka Meghalaya ia ka shap na ka GI ha ka Eri silk, ka jingthain kti jong ki longkmie jong ka Ri-Bhoi District. U Conrad ula ai khublei ruh ia ka KINIHO kiba la shna pynwandur ia ka jingdon jingem kaba rim da ka jingsumar bad ka jingtbit.