Ka jaka shangkai shiteng riat ha Phlangkynshi Sepngi lah ban iohi ka jingitynnad ka mariang

Lyngba ka skhim shispah sngi ne ka MGNREGA, tei ka shnong Phlangkynshi Sepngi ia kawei ka jaka jngohkai ha South West Khasi Hills. Kane ka jaka jngoh kai ka don ha shiteng riat bad ka lah ban iohi shynna ia kiwei ki shnong bad ia ki sawdong sawkun jong ka jingitynnad ka mariang. U Myntri shnong uba dei ruh u Chairman ka VEC jong ka Phangkynshi Mihngi u bah Polostar Marngar haba kren sha ki lad pathai khubor ula ai khublei ia u BDO uba la pynioh ia ka skhim bad kyrmen ban dang ioh shuh shuh ka skhim na bynta ban trei pynbha ia kane ka jaka jngohkai.

U bah Marngar ula pynpaw ruh ia ka jingangnud ba ka sorkar kan shimkhia khnang ba kin lah ban shna pyndep ia ka surok kaba dang sah khongreng khnang ban lah ban khring shuh shuh ia ki nongwan jngohkai ha kane ka jaka.Ula iathuh ba watla ka surok ka dang sniew, hynrei haduh mynta ki don bun ki ki nongwan shangkai na kylleng ki jaka kiba wan tuid ha kane ka jaka.

Katkum ka jingiathuh u Assistant Technical ka Mawkyrwat C&RD Block u bah Tennyson Kharmujai ula ong ba kane ka project la tei ha ka jingmang pisa kaba T.9 lak tam eiei bad haduh mynta ki dang don ki project kiba ka shnong kiba bteng ia ka jingtrei.Ula ong ba ka jingtei ka shnong kane ka jaka jngohkai ka long ban pyni ia ka jingitynnad ia ka mariang bad ka jingdon jong kane ka jaka kan iarap ruh ban kyntiew ia ka ioh ka kot ha kane ka shnong.