Ka JHADC kam dei ban ai NOC project lynti rel ha Jaintia: JSU

Ka Jaintia Students’ Union (JSU) hynne ka sngi  ka la leit iakynduh ia u CEM ka JHADC u Bah Thombor Shiwat bad ka la dawa ba ym dei ban ai No-Objection Certificate (NOC) na ka bynta ka projek rel katba ym pat pyntreikam ia ka Inner Line Permit (ILP) ha ka jylla. Ha ka kyrwoh khubor, ka JSU ka la pyntip ba ka pyrshah jur ia kano kano ka jingthmu ban ai ia ka NOC ia ka National Frontier Railways (NFR) ban shna ia ka lynti rel ne steshon rel ne kino kino ki kam kiba ia dei bad ka projek rel hapoh jong ka rilum Jaintia. Ka JSU ka la kyntu ia ka JHADC ba kan ym ai ia kano kano ka jingbit ne jingmynjur ia kum katei ka projek, tad haduh ba ka Sorkar Meghalaya kala ioh ia ka jingbit na ka Sorkar India ban pyntreikam ia ka Inner Line Permit (ILP) ha ka jylla. “Ka jingai NOC khlem ka ILP ka lah ban lam sha ka jingbym lah ban tehlakam ia ka jingwan rung kyrthep ne ka jingwan rung be-ain jong ki briew bad kane kan ktah jur bha ia ka jinglong jingman, ka kolshor bad ia ka jinglong tynrai jong ki jaidbynriew Jaintia bad ia ki trai ri trai muluk ha ka jylla Meghalaya baroh kawei” la pynpaw ka JSU.

Ka JSU ka la dawa na ka JHADC ba ka dei ban sangeh noh ia ka jingai Trading License ne kino kino ki jingbit ia ki bar jylla ha kaba iadei bad ka iohkam iohjam, khamtam eh ha kaba iadei ki kam bylla kiba la lah ban trei da ki trai ri trai muluk kiba sah hapoh ka district bad kala kyntu ba dei ban buh hakhmat eh ia ki paid trai ri trai muluk ha kaban iohkam iohjam bad ha ka kam khaii pateng ha ka district. Ka JSU ka la pynpaw ruh ba dei ban leit jurip bniah ia ki lisen dukan, ban pynlong man la ka por ia ka jingkhynra bad ban pynduh noh ia ki lisen ia kaba la suba ba ka don ka jingleh bym hok. Ka la dawa ruh na ka JHADC ba kadei ban bthah ban pyni ia baroh ka kyrteng jong ki bar jylla kiba trei ha ki dukan ne kino kino ki kam khaii. Kino kino ki bym kohnguh ia katei ka jingbthah, dei ban pynlong ia ka jingkhmih kaba bniah bad ban kyndang ia kitei ki briew na ka jylla lada ki pulom ha ka ban pyni ia ka thup ne ban ai ia ka jingpynshisha.

Ka JSU ka la dawa ruh na ka JHADC ba ka dei ban khmih bniah bha bad ban shim da ki sienjam kiba tyngeh pyrshah ia ki riew shimet kiba leh ia ka Benami katkum ka Benami Transactions (Prohibition) Act, 1998 bad lada ka JHADC kam leh eiei kumta ka seng kan leit ban mudui sha ka iingkashari ban dawa ia la ka hok.