Ka jingdawa naduh u Dr Mukul haduh mynta kam pat urlong: AMDA

Ka seng jong ka kynhun nongshad ka All Meghalaya Dancers Association (AMDA) haduh mynta ka dang iai ap ia ka jubab na ka sorkar jylla halor ka dorkhas kaba ka seng ka la dep aiti kham mynshwa ha ka sorkar. U President ka AMDA u bah Kitbok Thabah ha ka kyrwoh khubor, ula ong ba ka seng ka la iai shah la slem bad ka la pynsngew ia ki jingeh naduh ka sorkar barim ba ialam u bah DD Lapalang bad u Dr Mukul Sangma kum u Myntri Rangbah hynrei haduh mynta kam pat shym la urlong bad la kyrmen skhem ba kane ka sorkar hapoh ka jingialam u Conrad Sangma kan shimkhia ia ki jingdawa bad ki jingeh ba la pynsngew da ka seng lyngba ka dorkhas.

U bah Kitbok ula ong ba ka thong jong ka AMDA kadei ban ialam ban kyrshan ia ki samla ban ioh ia ka lawei kaba phyrnai bad naduh u snem 2000, ka AMDA ka la trei khlem shongthait  na bynta ban kyntiew ia ki samla kiba donsap ha ka rwai ka shad. “ Ngi la wad lad jingiarap ha ka liang ka pisa na bynta ban kyrshan ban ailad ia ki samla ba kin lah ban leit pyni ia ki sap jong ki ha ki rynsan ba heh ha ka jylla bad wat shabar ka jylla ruh,” ong u bah Thabah.

Ka AMDA ka la kynjoh sha ka 25 snem ka jingiaid lynti jong ka ha ka kam ban ai ka jingshakri sha ki samla ka jylla, namarkata la kyntu ia ka sorkar ba kan shimkhia ia ka jingeh namar bun ki samla mynta bad ki pateng ki shaniah ha ka jingialam ka seng na bynta ban plie lad ia ki. “ Ngi kyntu ia u Myntri Rangbah ban shimkhia ia ka jingkyrpad jong ngi bad ban pynurlong ka jingthrang jong ki samla,” ula ong.