Ka jingdon bun jait ki skul ka wanrah jingeh ïa ka sorkar, ong u Myntri Rangbah

Ka Nongkharai Presbyterian Higher Secondary School kaba don ha shnong Umsohpieng hapoh Mawshynrut Constituency, ka la kynjoh sha kawei ka thong kaba khraw mynta ka sngi da ka jingplie paidbah ïa ka ïing skul bathymmai. Ka jingtei ïa kane ka ïing skul ka long lyngba ka jingbei tyngka jong ka North Eastern Council (NEC) scheme. Ïa kane ka ïing skul thymmai la plie da u  Myntri Rangbah ka jylla Conrad K. Sangma uba long kum Kongsan ha katei ka sngi ha ryngkat ka jingiadonlang u Myntri ka tnad Food and Civil Supply bad MLA ka thain u Bah Methodious Dkhar bad la don ryngkat u R.G. Momin, MLA ka Rambrai-Jyrngam, u Bah Srally Rashir, MDC ka Mawshynrut, u Bah Garod LSN Dyke, Deputy Commissioner ka West Khasi Hills District, u Bah C. Andronal Lyngdoh, Principal ka Nongkharai Presbyterian Higher Secondary School bad kiwei pat ki ophisar sorkar. Kum ka dak jong ka jingplie paidbah, u Kongsan bad symbud kongsan ki la plie pyrda ruh ïa u Mawsahnam jong katei ka shlem pule.

Ïa ka jingïalang paidbah la pynlong ha phyllaw katei ka skul bad la pynïaid da u Rev. A. Nongbri, President ka Managing Committee jong katei ka skul. La pynkynmaw ruh ha katei ka sngi ba ia katei ka skul la seng nyngkong ha u snem 1966, bad u (L) Purno A. Sangma, u kpa jong u Conrad K. Sangma, u long u briew ba nyngkong eh ban noh synñiang pisa sha katei ka skul ha u snem 1988 da ka song pisa ba T. 75,000 ha ka por ba u dang bat kum u Myntri Rangbah bad Myntri ka tnat Pule Puthi jong ka jylla Meghalaya. Haba kren ha ka jingialang ha katei ka sngi, u Conrad Sangma ula pynpaw ba watla ka sorkar ka pynlut bun bah ka pisa ha ka pule puthi hynrei ka eh pat ban pynïaid beit pynïaid ryntih namar ka jingkyllaiñ ha kiba bun ki bynta. U la ong ba tang ha ka pule puthi ka sorkar ka pynlut haduh 3,654 klur bad na kane kumba 2 hajar klur duna la pynlut tang ban siew tulop ïa ki nonghikai bad 917 klur ka pynlut man u snem na ka bynta ban siew tulop ïa ki nonghikai deficit bad adhoc, 684 klur na ka bynta ki skul sorkar bad 366 klur na ka bynta ki skul SSA bad kine ki jingkheiñ ki dang ïai kiew na ka por sha ka por.

Ula ong watla ka sorkar ka pynlut bun ha ka pule puthi hynrei ka jingmih pat kam long katkum ka jingkhmih lynti bad ka don shibun ki daw bad ula ong ruh ba um kwah ban kynthoh ïano ïano namar ka pule puthi ka dei ka sobjek ba iar bad kaba eh bad kyllaiñ bha. “Ngi don haduh 14,582 tylli ki skul bad 55 hajar ngut ki nonghikai bad ngi don haduh kumba 20 jait ki skul bad kumba 25 tylli ki kynhun lane Association jong ki nonghikai” ong u Myntri Rangbah bad bynrap ba tang ha kawei ka shnong ki don laiphew jait ki skul ba la pynïaid da ki kynhun bapher bapher kaba pynlong ban duna khynnah ha ki skul bad bun ki nonghikai bad kane ka la ïaid palat 50 snem mynta bad ka jingdon ki skul bad lai phew jait ka wanrah jingeh ïa ka sorkar hynrei watla katta ka sorkar ka dang pyrshang ban pynbeit.