Ka jingiakhun u Kiang Nangbah iaka sorkar phareng ka long ruh ban iada iaka dustur riti ka jaitbynriew: Lat ka Jylla

Ka lyngkhuh sngi iap u khlawait ka Rilum Jaiñtia u Kiang Nangbah, bad ha kum kane ka sngi la kynmaw burom ia u haki bynta bapher ka Jylla, kumta ha kane ka sngi naka liang ka Seiñraij Jowai ruh kala shim iaka bynta ban leh burom iaka lyngkhuh sngi iap ba 162 jong u ha Myngkoi Pyrdi.Ha kane ka jinglehkmen kynmaw burom  u Lat ka Jylla u C.H. Vijayashankar ula long kum u kongsan, haka jingdonlang  u MLA ka 2-Jowai u Wailadmiki Shylla, u DC bad SP ka West Jaiñtia Hills District u B.S. Sohliya, u C.Syrti bad kiwei. La ioh ka jingkren pdiang na u President ka Seiñraij u H.Toi, ka jingnguh Blei na u Dolloi ka Elaka Jowai u Puramon Kynjing, katba halor ka khana u woh Kiang Nangbah la pynsngew da u Dr. Chanlangki Bareh. Ka Seiñraij ha kane ka sngi kala ai burom ruh ia u (L) Kambel Shullai halor ki kam ba bha jong u, kumjuh ba ula shimkhia ban pyndep iaki kam niam kam rukom,  khamtam ba u long ruh u nongshem nonglap iaka Khnap Thangbru (Eco-friendly Crematorium).

Ia u (L)  Roskil Challam halor ki kam ba bha ba sbun jong u sha ka Seiñraij haki bynta bapher bapher, khamtam ba u iarap iaki khun ka niamtre ban siew bainong shaki  tymmen Thangbriew  haka por  ba ka seng ka dawa jingiarap bha. Nangta ia u Mai Mai Laloo ba u dei u briew ba pyni ka nuksa  ba bha haki bynta bapher bapher lyngba ka sap ba kyrpang wat  hapdeng ka jingduna dkhot met, bad ula long ruh u nongjop ha kiba bun ki jait jingiakop Arm Wrestling la shabar Jylla kumjuh. U kongsan u C.H. Vijayashankar kum u Lat ka Jylla Meghalaya haba kren u iaroh iaka jingkhuid da kaba ong, kane dei lyngba ka  kitkhlieh ki nongshong shnong.Nangta u pynsngew ruh ka jingkmen ban ioh don bynta ha kane ka sngi  kynmaw burom ia u Kiang Nangbah kum u Khlawait ka Ri, ba kum u riew paidbah u lah ban iakhun pyrshah iaka sorkar phareng bad  ka jingiakhun jong u ka long ruh ban iada iaka dustur riti ka jaitbynriew, kaba pynkynmaw ia  baroh ban iengskhem naka bynta kane ka juh ka nongrim.

U iaroh ruh iaka Seiñraij kaba lah ban pynneh pynsah iaki jinghikai u mynbarim naduh ka Behdieñkhlem, ka Shad Sukra bad kiwei da kaba  ong ba kito ki bym tip iaka History kim lah ban shna History. Kumta ban kynmaw iaka nam u Kiang Niangbah, baroh dei ban  don ka jingkitkhlieh naka bynta ban pynneh pynsah iaki mynbarim.