Ka jingkhang tih dewiong ka long kumba knieh pliangja kam long kaba suk: Conrad

U Myntri Rangbah ka jylla u Conrad K Sangma, ula kyntait halor ka jingkynnoh ka liang pyrshah ba ka sorkar ka len halor ka jingdon ki jingtih dewiong beain. Haba kren sha ki lad pathai khubor, u Conrad ula ong ba ka sorkar kam shym la kyntait bym don ka jingtih dewiong beain hynrei ka la shim ia ki sienjam ba tyngeh pyrshah ia ki briew kiba tih dewiong beain. U Myntri Rangbah ula ong ba ka jingeh ka long ba ka sorkar kam lah ban pynduh noh mardor ia kane ka kam ha ka jylla, namar kane ka dei ka kam naduh ki por mynshwa ha kaba bun na ki briew kiba la mlien ban trei ia kane ka kam, ki dang shaniah sah ha kane ka kam na bynta ban pynbiang ban pyndap ia ka iing ka sem.

“Kam long kaba suk ban shu knieh jyndat ia ka pliang ja jongno jongno, namar ba kine ki briew ha ki spah snem ki bsa ja na kane ka kam,” ula ong. U Conrad ula ong ba ka dei ka kamram jong ka sorkar ban pyntreikam ia ka ain bad ka la pyrshang katba lah ban tehlakam, hynrei ba kam long kaba suk ban shu knieh jyndat ia ka jakpoh jong ki briew. U la ong,  “Kam dei kaba suk ia ngi ban leh mynta ban dep lashai bad dei ban sngewthuh ia ka history jong kane ka kam. Hynrei mynta lyngba ka jingsdang ka jingtih dewiong da ka buit saian kan plie lad biang.” U la iathuh ruh ka sorkar ka la ujor mukotduma da ki hajar tylli pyrshah ia ki briew kiba tih dewiong beain ha ka jylla.

“Da ki hajar ngut ki briew ki la shah kem bad da ki hajar ngut ki briew kiba la shah pynngat kyndon bad bun ngut kiba la shah set bad la khang khyrdep ruh ia ki par. Ngi la bthah ia baroh ba kin sahngeh ka tih dewiong beain, hynrei kaei kaba nga kwah ban ong ka long ba naduh mynshwa, ki briew ki la ap kmang na kane ka kam ban pynbiang ia ka jingdonkam ba man ka sngi. Namarkata kam long kaba suk ban shu khmih lynti ba ki briew kin shu sahngeh noh namar ba la mih ka hukum na Iing bishar, hynrei kin tur beit watla ki don hapdeng ka jingma ruh,” ula ong.