Ka jingkhlad noh u Dr Ricky ka jingduh ba khraw jylla bad ka Party : Ardent

U President ka Voice of the Peoples Party (VPP) u Bah Ardent Miller Basaiawmoit ula ong, ba ka jingkhlad u Dr Ricky Syngkon ka long ka jingduh ba khraw ia ka jaidbynriew bad ia ka jylla khamtam haba ki don ia ka thong ban wanrah ia ka jingkylla ban ioh ia ka synshar khaddar kaba khuid.

U Bah Ardent M Basaiawmoit ula ong, kum kiba ia donlang hapoh ka seng, kum ka seng bad kum u riewshimet ka long ka jingkyndit kaba khraw ban ioh ia ka jingtip ba I Dr Ricky iba long u MP ka Shillong Parliamentary Seat bad u General Secretary ka VPP ba i don hapdeng ka jingshitom kaba jur ha ka jingkyllon ka jaka ialehkai bad kaba sngewsih kthang ka long na kane ka jingjia ila khlad noh na sla pyrthei.

“Kum kiba iatrei ryngkat ngi sngewthuh ba ka long ka jingduh kaba khraw, namar ngi don ia ka thong ban wanrah ia ka jingkylla ban ioh ban wanrah ia ka synshar khaddar kaba khuid na ka bynta ka jingshngain na ka bynta ka la shai ka lashai sngi jong ki longdien mandien. Kum ka seng haba ngi iatreikam, ngi trei kum ka longiing kaba don ia ka jingiasngewthuh jingmut bad ka jingieid kaba mar kylliang bad kaei kaei kaba ngi leh, ka dei kaba ngi leh da ka jingiasngew thuh lang. Ngi sngew ba ka long ka jingduh kaba khraw ia uwei na kiba la iadon bynta ha ka ban seng ia ka Party uba la iaid lynti ryngkat ha kine ki khyndiat snem naduh ba ngi seng bad u long ruh uwei na ki nongialam uba kitkhia bha ia kino kino ki kam kiba ngi bynshet ha u kum ka Party. Ngim don thylliej ban batai haduh katno ka long ka jingktah ia ngi kum ka Party bad haduh katno ka long ka jingduhnong kaba khraw ia ka jaidbynriew hynrei kum kiba ngeit, ngi don ka jingkyrmen ba u Blei un ym iehnoh ia ngi kum ka Party bad u Blei un ym iehnoh ia ka jaidbynriew bad ia ka ri kaba ngi da donkam shisha ia ki briew kiba beit ha ka jingmut jingpyrkhat bad ki briew kiba sngewrit bad kiba don ia ka nam kaba bha bad kiba shaniah ha u Blei uba ngi shakri” la ong u Bah Ardent.

Ula ong ruh, ba u Dr Ricky Synkon u long u briew uba sngewrit, ka jinglong kaba lah ban shaniah bad ka nam kaba bha bad watla tang ha ka khyndiat por ba ula rung ha ka lympung jong ka sain pyrthei ula ioh ia ka jingieid ki paidbah ka ri bad ka jingsngewsih kthang jong u paidbah bad katkum ka jingtip kaba lah ban sngewthuh kam pat ju don kane ka jingsngewsih hapdeng u paidbah nongshong shnong ha ka ri ha kum kane ka jingsngewsih kaba ki mad ha kum kane ka kynti kaba mynta” la ong u Bah Ardent.