Ka jingkynnoh ba shu kyrhuh na khlaw ka pynjah burom ia ka Jaidbynriew

Ka kynhun kieng atiar Hynniewtrep National Liberation Council (HNLC) ka la phah da ka shithi paidbah ne Open Letter sha ka Myntri Sorkar ka Kong Ampareen Lyngdoh halor jingkynnoh ba ka HNLC ka shu kyrhuh na khlaw hynrei la khot pat ia ki ban iashim bynta ha ka ilekshon ka Ri ka long ban bakla bad pynjah burom ia ka mat tynrai ia ka jinglong trai bad ki hok ka jaidbynriew Hynniewtrep. Ngim shym la “kyrhuh na khlaw” ym kaba ngi jied hynrei namar ka jingdonkam. Ka histori ka la pyni haba la pynsngap jar ia ka sur jong u paidbah bad la thombor ia ka hok jong u, ka ri khlaw ka kylla long ka jaka rieh ban iakhun pyrshah. Ka HNLC ka ieng kum ka nongiada ia ka jinglong bad ka jingsynshar jong u Hynñiewtrep, baroh ar ki la shah pynduh ha ka rukom ba ryntih lyngba ki jingleh thok lyngba ka kam sain pyrthei bad ki jingshet kylla ha ka histori” la pynpaw u General Secretary cum Publicity Secretary ka HNLC u Bah Sainkupar Nongtraw ha ka Open Letter. Ula pynpaw, ban kyntu ia ngi ban iashimbynta ha ki elekshon India ba la pynjari ia ka khyndew jong ngi, phim lah pulom ha kaban ithuh ia ka nongrim jong ka jingialeh ka jong ngi— ka jingialeh na ka bynta ka jingsynshar jong ngi. Kine ki elekshon kim dei ka jingpynpaw ia ka synshar paidbah na ka bynta jong ngi hynrei kadei kaba la khein bha ban pynlong aiñ ban shimti be-aiñ ia ki jaka. Phi pyniadei ialade bad ki bor kiba pynjah burom ia ka jingiateh kular bad u Hynniewtrep kaba la iasoi ha ka snem 1947, da kaba pyndem ia ki nongrim kiba pynskhem. Ka jingkhot jong phi ban iashimbynta kam dei eiei hynrei ka jingpyrshang ban pynneh pynsah ia ka jingsynshar ki phareng bad ban pynduh ia ka jingialeh hok jong ngi ban synshar hi dalade.

Ha ka shithi paidbah u Bah Sainkupar Nongtraw ula ong “Lada phi kwah shisha ban ailad ia ki paidbah ka Bri Hynniewtrep ban rai, ngi kob ia phi ban pynlong ia ka jingiathep vote (referendum) lane jingiajied paidbah (pebliscite), kaba iasyriem ia kaei kaba la leh da ka FARC bad ka Sorkar Colombia ha u snem 2016, lane kaei kaba ki paidbah ka Scotland ki leh ha u 2014. Ai ba ka pyrthei kan iohi la ki paidbah ka Bri Hynniewtrep ki kyrshan ne em ia ka rukom pyrkhat jong phi lane ia ka jingialeh jong ngi ban synshar dalade. Lada ki paidbah ki jied ban iai neh bad ka India bad kyntait ia ka Ri Hynniewtrep kaba laitluid, ngin ieh noh ia ka jingialeh jong ngi da kaba kieng atiar bad ngi kloi ban pynlut ia ka por jong ka jingim jong ngi hapoh jongka phatok”. U nongialam ka HNLC ula kynthoh ruh ia ka Myntri ba ka kynnun ba ka HNLC ka don ia ka mynsiem sngew iapher jaidynriew bad ba kwah pyniapait iapra bad ula pynpaw, “Phi la kynnoh ia ngi ba ngu don ka mynsiem iapher Jaidynriew, da kaba kam ba ngi kwah ban pynkha ia ka jinglong jingman kum ha Manipur. Ban ianujor ia ka Hynniewtrep bad Manipur ka long kumba ianujor ia ka miet bad ka sngi. Ngi don iala ka jong ka jaka ba ai pateng da ki kpa tymmen, kaba don ia ka histori bad ka kolshor kaba la suhthied bha. Ki sakhi na ki jingwad bniah ki pyni ba ngi dei kawei na ki Civilization bala rim bha ha Asia. Watla katta, ngim don la ka jong ka Ri, ngi la shah shet kylla ha ki Sorkar kawei hadien kawei, kiba la pynjah burom ia ki Syiem jong ngi bad ym khein snep ia ki jingaiti lut jong ki Khun u Hajar ka Hynniewtrep”.

 “Phi kam ba phi mihkhmat ia ki paidbah, hynrei na ka jingaram hapoh ka kamra thiah jong phi? Ka jingkam Nongialam jong phi ha Iingdorbar Thaw Aiñ ka Jylla ka dei kaba kam kai, kumba paw na ki video bala saphriang kiba pyni ba phi iohthiah ha kiba bun ki khep kiba kongsan. Ka nongthawaiñ ba jaituh bad kaba iohthiah lyngngai, phi la shet kylla ia ka jingshaniah bala ai ha phi. Hato kane kadei ka jinglong Nongialam? la buh jingkylli u Nongialam ka HNLC. U Bah Sainkupar ula pynpaw, “Ka Histori kan kynmaw ia phi kum ka dur jong ka jyrsieh tah siah lieh, ka nongthaw aiñ kaba la thohbria. Katba kiwei ki ieng ban mad ia ka jingbishar ba hok, phi pat phi kiar na ka jingkitkhlieh, da ka jingiada lyngba ka bor saiñ hima u Conrad Sangma. Phi long kum ka Nongialam bamsap, ka nongmihkhmat ba donkti ha ka kam bymman kaba pyndonkam ia ka jingiadei bad ki bor sain pyrthei ban kiar na ki jingshisha. Hato dei kane ka nam kaba phi kwah?” Ka jingpynkynmaw ha ka kam sain pyrthei, kiba bamsap ki kiew katba ki paidbah ki mad ia ka jingjynjar.  “Kong Lyngdoh, ka HNLC ka ieng skhem khlem jingkyiuh ne ban pyndem, ka kyntait ban iatylli bad kano kano ka seng sain pyrthei. Ngi iohi lyngba ki buit jong ki— la u long u Suri Garo uba kup snieh langbrot ne u Myrsiang Khasi uba don ia u thylliej rupa baroh ar ki ialam ia ki paidbah ki jong ngi sha ka sem masi ki Hindu ban shah pyndem” la pynkut u nongialam ka HNLC.