Ka jingpynkylla kyrteng ka BJP ia ka skhim MGNREGA kan ktah ia ki paidbah: Congress

Ka Meghalaya Pradesh Congress Committee (MPCC) hynne ka sngi ka la pynlong ia ka jingialang paidbah ha Mawkyrwat, South West Khasi Hills district ban pynpaw ia ka jingpyrshah jur halor ka jingpyndam ka sorkar BJP ia ka kyrteng Mahatma Gandhi National Rural Employment Guarantee Act (MGNREGA) da kaba wanrah bujli da ka kyrteng VB-GRAMG scheme.Haba kren ha ka jingialang paidbah, u President ka MPCC u bah Vincent H. Pala ula ong ba kane ka rukom leh ka sorkar pdeng ba ialam da ka BJP, ka long kum ban nioh bein ia ki nongkyndong kiba duk ba suk bad ia kito kiba kamai sngi kiba shaniah na kane ka skhim. Ula ong ba ka MGNREGA kam dei ka skhim ai jingiarap hynrei kaei ka skhim kaba la ithuh da ka ain na bynta ban ioh ia ka hok ban trei ban ktah. “Kano kano ka pynkylla ia kane ka ain, ka pyni ba ka sorkar BJP ka niew shilliang ia ki nongkyndong kiba im ja sngi na kane ka kam bad ka long ruh kumba ka pynkhein ia ki kyndon jong ka riti synshar ka ri,” ong u bah Pala.

Ha ka jingialang ula batai shai ia ka jingdonkam jong kane ka skhim MGNREGA kaba la bsa ia ki hajar ngut ki longiing ha ka thain jong ka SouthWest Khasi Hills, khamtam ia kiba sah ha ki kyndong kynshrot bad ha ki jaka ba duna ka ioh ka kot. Ula kynnoh ba ka jingwanrah ia ka kyrteng VB-GRAMG kam long kaba khuid bad kaba shai. Katba na ka liang u Vice President ka MPCC u bah K. Lyngkhoi bad u Secretary ka MPCC u bah Manuel Badwar, ki la maham ba ka jingpyndam ia ka kyrteng jong ka MGNREGA, kan ktah ia ki paidbah ha kylleng ki jaka. Ki la kyntu ia ki paidbah ba kidei ban iatylli ban pyrshah ia kane ka polisi kaba pyrshang ban pynhiar arsut bad kaban ktah ia ka ioh ka kot khamtam ha ki thain Nongkyndong. Ha kane jingialang, ka Congress ka la pdiang sngewbha ruh ia ki katto katne ki riew rangbah kiba la rung pyniasoh sha ka party kiba kynthup ia u bah Denis Nongsiej u Joint Director ba la shongthait jong ka tnad Pule puthi ka sorkar jylla, u bah Barister Thyrniang u kyrtong barim jong ka KHNAM uba la mih ban iakhun ia ka ilekshon MDC ha u 2024, Sngaphunlang Kharlyngdoh, Assistant Lecturer ka Laban Assamese Higher Secondary School bad Kordorlyne Kharlyngdoh Vice President barim jong ka Trinamool Congress, Mawkyrwat.

U bah Pala ula ong ba ka jingpyniasoh jong kine ka pyni ba ki paidbah ki dang shaniah ha ka party bad kane ka nang ai mynsiem shuh shuh ia ka party kaba trei na bynta ka hok ha ka imlang sahlang bad ka jylla hi baroh kawei. Ha kane ka sngi, la donlang ka kong V. Syiemlieh ka President jong ka District Mahila Congress Committee, ka lengskhem Syiemlieh, President jong ka District Youth Congress, ki nongtrei ki nongialam na ka Mawkyrwat bad Ranikor Block Congress Committee.