Ka jingpyrshah Sorkar, ka daw ba shah rem ka UDP ha ka ilekshon KHADC-JHADC

U Nongialam ka United Democratic Party (UDP) u Ba Paul Lyngdoh uba dei ruh u Myntri Sorkar u la kam ba ka ‘Jingpyrshah Sorkar’ ka dei kawei na ki daw ba ka UDP ka khlem lah ban lehbha ha ka ilekshon shaki Autonomous District Council (ADC) ha Rilum Khasi bad Jaintia.

Haba kren sha ki lad pathai khubor u Bah Paul u la ong “Ka jingbym lah leh bha ka dei namar ka jingpyrshah Sorkar naba ki briew ruh ki sngew ba u synsar thymmai u kham sar khuid bad phi tip bha ba ka VPP kam pat ju don ha ka bor kumta ka suk palat lada phi shu shong na gallery ban kdew hangno ka iaid bakla ha madan hynrei lada phi la don slem ha madan, ki briew kin sa lah ban kdew ia ki jingbakla jong phi namar phi hap ban trei bha hynrei ka VPP haduh mynta kam pat ju iohbat ia u lakam ka jingsynshar. Kumta, ka long kaba suk ban ong ba ngi dei kiba khlem bor bad ai ha ngi ia ka bor bad ngin ai ka jingshakri”.

U Bah Paul u la pyntip ruh ba shen ka UDP kan sa iakynduh bad baroh ki nongialam bad ki nongkitkam ban iakren ia ki jingmih na ka ilekshon ADC. Lah ban kdew ba ka UDP kala jop tang 5 Seat ha ka ilekshon shaka Khasi Hills Autonomous District Council (KHADC) bad 3 Seat sha ka Jaintia Hills Autonomous District Council (JHADC). U Nongialam ka UDP u la pynpaw ka jingiaroh iaka Voice of the People Party (VPP) kaba la jop 17 Seat ha KHADC bad 8 JHADC bad u la ong “Kala bha palat mynta ba ka (VPP) kala don ha ka kyrdan ba biang eh ban ialam ia ka EC hapoh KHADC. Nga kitbok ia ngi bad kitbok ruh ba kin lah ban pyndep iala ki jingkular”.