“Ka jingsah ïingjah ki ïing baduk ha Nongmensong dei ba khlem pyndep jingshna”

U MLA ka Pynthorumkhrah, u bah AL Hek u la ong ba ka jingsah iingjah bun snem ki iing baduk (BPL) ha Nongmensong dei namar ba khlem pyndep ia ka jingshna hynrei hadien ba la pyndep ruh, ka sorkar ka khlem pat ai sha kiba duk kiba dei ban ioh ban sah ha katei ka iing. U bah Hek ula ong ba kitei ki iing baduk, la shna kyrpang khnang ban ai  ia ki briew kiba sah ha ki jaka ba long kum ki Slum area. “Ka jingsah bun snem ka dei namar ba khlem pyndep ia ka jingshna hynrei hadien ba la pyndep ruh, khlem pat ai sha kiba duk kiba dei ban ioh ban sah ha katei ka iing. Ia kitei ki iing la ai ia ki briew kiba sah ha ki jaka slum,” ong u bah Hek. Ula ong ba ka jingioh bynta ki briew ban sah ha ki iing baduk , la peit katkum ka jinglong duk jong ki ha ka ioh ka kot.

U bah Hek ula bynrap, ” Ka jingjied ban ioh ia ki iing, la hap ban peit ia kiba duna na kiba duna tam ne kiba duk na kiba duk tam ban ioh, ym ban shu ai kat kiba pan ne aplai.Ki briew ba ioh ia kitei ki iing baduk ki don na Mawprem, Nongmensong bad na kiwei ki jaka, katkum ka jinglong duk jong ki”.  U bah Hek u la ong ba kaba sah mynta ka long sa tang ban pynbeit da ka Committee khnang ban lah ban ai bhah noh ia ki iing ba la shna sha kiba dei hok., ” Ki iing baduk ka la sah bun snem namar ba ym pat dep bad kiba la dep khlem pat ai sha kiba duk bad ngi la rai na ka shnong Nongmensong ban ai noh ia ki iing kiba la la dep bad ia ki kyrteng jong ki briew ban ioh ruh la dep rai bad kaba sah sa tang ban ai noh ia ki ban sah”, la ong u bah Hek.

Kitei ki iing baduk ki don kumba  saw tylli eiei ki block  kiba la dep shna nadong shadong Nongmensong, hynrei ki dang sah thylli haduh mynta namar ba ka sorkar jylla ka pynslem ban ai ia ki briew kiba duk ban leit sah ha kitei ki iing kiba la dep shna.Kum ban shu kdew, dang shen ka seng FKJGP Nongmensong ki la leit pynsngew sha ka tnad sorkar ba kadei ban leh eiei ia kitei ki iing kiba la shu ieh la bun snem, namar ka jingieh khongreng ia kitei ki iing, ki kylla pynban kum ki jaka leh kam sniew ba har rukom.