Ka jingsdang ban pynkylla dur ia ka Shillong: Conrad

Ka Myntri pla tyngka ka Sorkar Pdeng ka Nirmala Sitharam ryngkat bad u Myntri Rangbah ka jylla u Conrad K Sangma hynne ka sngi ki la plie ia ka Polo Commercial Complex ba la tei ha ka jinglut ba T.100.33 Klur. Haba kren ha ka jingialang u Myntri Rangbah ka jylla u Conrad K. Sangma, ula iaroh bad pynpaw ka jingsngewnguh ia ka Myntri Nirmala Sitharam kaba la iai bteng ban kyrshan ia ka jylla bad ia ka thain shatei lammihngi ka Ri. “Nga lah iatreilang la bun snem bad ka Myntri Pla Tyngka bad ka long ka briew ba sbun bad haba ngi leit kyrpad na ka bynta ka jylla kam ju ong em” la ong u Conrad Sangma. Ula bynrap ka jylla Meghalaya lyngba ka jingiarap ka Myntri Pla Tyngka bad ka tnad ka la ioh shibun ki Special Assistance to States for Capital Investment (SASCI) scheme bad ka Meghalaya ka dei napdeng katto katne ki jylla ba la ioh pyndonkam ia kane ka scheme.

Ula ong kane ka Shopping Complex, ka dei ba la pynwandur na ka bynta ki paidbah ka nongbah Shillong bad ka dei ka jingsdang bad nangne shakhmat yn sa iohi shuh shuh ia ki projek ki bapher bapher. Ula bynrap ka Shopping Complex bathymmai ka dei ka jingsdang ia ka jingpynkylla dur ia ka nongbah Shillong bad ula ong ba shen yn sa khot tender ban pyniaid da ki riewshimet ia kane ka ‘Mall’ bad la khmih lynti ba kan long ka jaka pdeng na ka bynta ban sengkam ki samla bad ka kam jngohkai. Ia kane ka Polo Commercial Complex la tei da ka Smart City Mission ha ka jinglut jingsep kaba kot T.100.33 Klur ha ka jaka kaba 1.7 Lak sq ft kaban kynthup ia ki 109 tylli ki dukan, kin don ruh ki jaka bam ba kyrpang ne Food Court bad ki jaka ialehkai ne Gaming Zone, ka jaka na ka bynta ban buh ia ki 8 tylli ki jaka treikam bad ka jaka pynieng ia ki kali bad thuk thuk.

Ka ban khring bha ia ki paidbah sha kane ka jaka ka dei ka jingbuh ia ki Escalator kaba ki paidbah kin ioh ban ieng khlem da donkam ban iaid lyngba ki mawkyndon.Ha kane ka jingplie ia ka Polo Commercial Complex la iadonlang u Symbud Myntri Rangbah ka jylla u Bah Sniawbhalang Dhar uba khmih ruh ia ka kam Pynroi Sor, ka Myntri ka tnad ka Koit ka khiah ka Kong Ampareen Lyngdoh, u Chief Secretary ka jylla u Bah DP Wahlang, ki heh ophisar sorkar bad kiwei kiwei.