Ka jingstad ka long waitlam mynta ban saindur ia ka lawei:Lambokstar

Ka Khasi Student Union (KSU) NEHU Unit ryngkat ka jingiatreilang bad ka Hynniewtrep Hosteller’s Union hynne ka sngi ka la pynlong da ka Khasi General Farwell 2025 kaba dei ka jingai khublei kyrpang ia ki samla ba la pyndep ia ka jingpule na ka skulbah NEHU ia kaba la pynlong ha Community Hall, NEHU. Ha kane ka sngi la donlang ruh u President ka KSU u Bah Lambokstarwell Marngar kum u Kongsan bad u Bah Daniel Thangkhiew kum u Symbud Kongsan nalor ki nongialam ba hakhmat ka KSU, NEHUSU bad KSU NEHU Unit nalor ki samla pule. Haba kren ha ka jingialang u President ka KSU u samla Lambokstarwell Marngar ula ong ba ka long kaba donkam ia ki khun samla ban pynjanai ia lade ha ka jingmut jingpyrkhat bad khamtam ban puson ia lade shano kin jam yn da ki la mih noh na kane ka skul bah. “Mynshwa ki kmie ki kpa ha nongkyndong ki ong ba ki phah skul ia ki skul tang ban nang thoh shithi samla hynrei ha kine ki sngi pat ki kmie ki kpa ki iohi ia ka jingkordor jong ka pule puthi, ki iohi ba ka pule puthi ka dei ka waitlam ka ban saindur ia kita ki jinglong jong ki samla bad ki iohi ruh ba ka pule ka dei u mawmer ha ka jingim jong ki” la ong u samla Lambokstarwell.

U samla Lambokstarwell ula ong, ba ha ka jingim jong ki samla khamtam ki nongialam jong ka KSU ha skulbah NEHU khlem pep kin mad ia ki jingtynjuh bad kin mad ia ki jingeh hynrei ki dei pat ban skhem ban bah ia ka Jaidbynriew baroh kawei. Na ka liang u Bah Daniel Thangkhiew ula iathuh ba kumno ka mynsiem iakhun kum ki nongialam ka seng naduh ka por ba ki dang don ha ki jaka pule kam pat lip satia wat haduh mynta mynne.”Kam dei kaba suk ia kiba bun ki samla ba kin poi haduh katei ka kyrdan pule ha skulbah NEHU” ula ong da kaba bynrap ba ki dang don bun kiwei pat ki  ki bym ioh ia ka lad ban pule bad pyndep ha ka skulbah NEHU.U Bah Daniel u la ong ba ka Jaidbynriew kan im lada ki khun samla ki im bad ula kyntu ia ba kin rung ha ki kam hikai, ha ki kam shakri sorkar kum ki ophisar bapher bapher khnang ba kajuh kaba ki kynduh jingeh kin ioh pat ban iarap ia kiwei ia ka jingshakri haba ki don ha ka bor bad ha ka sorkar.

U ong ruh ba ki samla ki la pynlut bad bor bad ka por bad ruh ia ka kamai jong ki kmie ki kpa, kumta u la ong ba ka por ka la poi ba kin hap ban thom ia ki jingeh kiba wit ha lynti ban iakhun bad mih na kane ka jaka ban leit sha kiwei ki bynta jong ka jingim bad wanrah kylla ia kiwei pat ki jingshakri naba bun ki donkam ia ka jingiarap jong ki. La ioh ruh ia ka jingkren na u President jong ka KSU NEHU, na ka Research Scholar Forum, na u President NEHUSU bad ruh na u Education Secretary ka KSU Sengkmie Samla Pynkmenlang Sanmiet nalor ka jingkren ba kyrpang na u Kongsan Kyrpang, Bah Baiengskhem S Lyngdoh.