Ka jingthaw ia ka NREF ha Delhi ka buit ban pynkhlain ia ka NPP, ong Bah Ardent

U President ka Voice of the People Party (VPP) u bah Ardent Miller Basaiawmoit ula kyntait ban ia donlang ha ka North Regional East Forum ba la thaw dang shen ha Delhi ba kynthup ka NPP, Tipra Motha Party bad kiwei. Katkum ka jingong u bah Ardent ban khmih lynti ban don ka jingiatylli ki seng ha North East ha ka Lama jong ka Northeast Regional Forum ka dei tang ka jingthmu ban pynbiej paidbah. Haba iakren mynta ka sngi, u bah Ardent ula ong ba la tip shai ba kawei na ki party ba ialam ia kane ka jingthmu ka dei ka National Party, (NPP) bad hangne yn sngewthuh shai ba ka don ka jingkynriah nongrim. “Mynshwa phi wan sha ki paidbah phi kam ba ka dei ka party ba don ha kylleng ka ri India, hynrei mynta na ka nongrim ka National party phi wan ban kam ba donkam ia ki nongrim jong ki seng trai ri, nga tharai kane ka la ia lait ka rukom pyrkhat bad ka jingpynshong nongrim na ka jingpyrkhat jong ngi”, la ong u bah Ardent. Ula ong ba lada kwah ba ka sorkar India kan sngap kan ioh sngew ia ki paidbah ka thain hap ban ieng ban pyni ia ki jingiatylli ha ki mat ba donkam da kaba klet ia kiei kiei baroh. “Hynrei ban ong ban iatylli kum kawei ka lama jong ki jylla ha NE haba don pat la ki jong ki nongrim, ngam iohi ba kata kan ialam shano shano,” ula bynrap.

“Kumno ngin khmih lynti ia ka jingiatylli jong ki seng ha NE ha ka Lama jong ka Northeast Regional Forum, namar wat tang ban buh ia ka ktien Regional, nga tharai ki la dei ban lehrain namar kane ka dei tang ka jingthmu ban pynbiej paidbah.”, la ong u bah Ardent. Haba kylli la kane ka dei ka rynsan ban pynkiew ia ka NPP, ula ong ba ka NPP kan mad jingeh la ka dei ha kane ka jylla bad kan nym lah ban suh thied sha kiwei ki jylla. “Kane ka dei beit na ka bynta ka jingthmu ia la ka jong ka party ban pyntikna ba kane ka dei ka party ba kiwei ki jylla ruh ki phai khmat ki shaniah bad ma ngi ruh ki trai muluk ngin ai ka jingshaniah”, la bynrap u bah Ardent. Ula ong ruh ba kane ka dei tang ka buit bad ka jingthmu ban pynskhem bad pynkhlain ha u snem 2028 kin wan phai biang sha ka bor. Ha kajuh ka por, ula iathuh ba ka VPP ka la iakren hi bad ki katto katne ki nongialam ka thain shatei lammihngi, ki briew na kiwei ki jylla, ki thrang shisha ba ka VPP kan suh thied kan pyniar ia ka jingtreikam jong ka, ym tang hangne hynrei sha kiwei ki thain. Hynrei ka VPP ka la kren shai ba ia mynta hi ka kwah ban pynkhlain shwa ia ka party na kane ka jylla bad yn sa ia pyrkhat ha ki por ban wan ia ka jingiaid lynti jong ka party sha kiwei pat ki jylla.

U la ong ba ki briew ba pynsngew ha u, kim dei ki nongialam jong ki seng sain pyrthei hynrei ki dei ki riew rangbah kiba don ka jingsngewkhia namar ha ba ki peit ki bud dien ia ka VPP bad ka jingiaid lynti bad ki nongrim, ka la khring wat ia ki briew kiba don shabar shatei Lammihngi.Halor ka jingkylli ia ka jingtreikam kane ka sorkar, u bah Ardent ula ong ba ka jingtreikam jong kane ka sorkar ia mynta ka long beit tang ban pynthame bad bad pynbiej ia ki paidbah na bynta u snem 2028.“Ka jingshisha ka long hi ba ka jylla Meghalaya ka don hapdeng ka jingma ba khraw na ka jingshim ram na ka diang ka mon bad ka jingpyrshang ban pynksan bad na kine ki projek ba la shu wanrah ha kane ka jylla, ki dei ki projek kiba la shu pynheh dor khlem don ka rukom pynshong nongrim ka ban ia dei dur bad ka jingdawa ba ka jingdonkam jong ka kam.”, la ong u President ka VPP. U bah Ardent ula ong ba ki riew paidbah ki iohi ia ka kaiphod halor ka pep skul shiteng por ki khynnah pule, ka jinglong jingman ka koit ka khiah haba phai sha ki jaka sumar jong ka sorkar, ki lynti syngkein ki surok, yn shym iohi ia ki dak ki shin jong ki jingtrei jong ka sorkar, kaba pyni ia ki jingduna kiba bun bad ka bym iahap katkum ki jingkular mynshwa shwa ba kin wan ha ka bor.