Ka jingthung kam ia ki trai jaka katkum ka jingiateh bad ki projek bording: Metbah

U Myntri ba khmih ia ka tnad bording u bah Metbah Lyngdoh ula iathuh ba ka jingthung kam direct kan treikam katkum ka kyndon kiba don ka jingiateh bad ki longiing kiba shah ktah ha ka projek bording.Ula ong ba ka jingthung kam ka shong tang ia kito ki trai jaka kiba shah ktah hynrei kane ka jingthung kam direct ka dei na ka bynta ki kam ha ka Grade C bad D katkum ka jingiateh bad ki trai kiba shah ktah ha ka projek bording. Ia kane u Myntri ula jubab ha ka kynta kylli jingkylli ba la wanrah da u MLA ka UDP na West Shillong u bah Paul Lyngdoh hynne ka sngi ha Iing Dorbar Thawain ka jylla halor ka jingthung kam ia ki trai jaka kiba shah ktah ha ki projek bording.Ula iathuh ba ka jingthung kam, kan long kaba khuid bad kaba shai katkum ki kyndon bad ki ain treikam jong ka Meghalaya Reservation polisi.

Ha ka jingkylli bynrap halor kane, u bah Paul ula buh jingkylli biang, kaei ki kyndon ban pynthikna ban ai kam kyrpang ia ki trai shnong ha ka jingpeit ka tnad bording.Haba u myntri ka tnad bording u bah Metbah ula jubab halor kane, u bah Paul ula ieng da kaba ong ba u Myntri u pyrshang ban jubab kyllain . Na ka liang u bah Paul ula bynrap jingkylli hato ka Meghalaya Industrial and Investment Promotion Policy 2024, ka pyntreikam ne em ka tnad bording bad halor kane. Halor kane u bah Metbah ula jubab da kaba kubur ba ka la pyntreikam ia kane.

Hadien kane, na ka liang u Myntri Rangbah u Conrad K Sangma ula iarap jubab ba ki project kin bud pyrkhing katkum ka Investment Act, hynrei kine ki dei ki kyndon katkum ki jingiarap pisa susidy ba la pynbiang.“ Hoid, kane ka policy kan treikam ia baroh ki projek,” ong u Myntri Rangbah.