Ka jingtih Uranium kan pyniap ia ki trai muluk bad pynriew spah ia ka India

U nongialam ka Khasi Students Union (KSU) u bah Lambokstar Marngar ula ong, ba ka jingpynmih ka sorkar India ia ka Office Memorandum (OM) ba ym donkam ban sngap ia ka sur u paidbah ha shwa ban tih ia u marpoh khyndew u Uranium, ka dei ka buit thymmai tang ban pynkbum ia ka sur u paidbah.

Dang shen ka sorkar India lyngba ka tnad Ministry of Environment, Forest & Climate Change ka la pynmih ia kane ka OM ba ym donkam shuh ban sngap ia ka jingai jingmut jong ki paidbah ha shwa ban tih ia u Uranium uba dei u Atomic Minerals.

Haba kren sha ki lad pathai khubor u bah Marngar ula ong ba ka seng kam sngew phylla ia kane ka rukom leh ka sorkar India, namar ka ju pyrshang na ka por sha ka por ban ioh tih ia u marpoh khyndew ha kane ka jylla bad mynta ka la pyrshang da ka ban set ia ka sur u paidbah.

Halor kane ka mat, ula ong ba ka seng ka la ju pynsngew na ka por sha ka por ia ka sorkar jylla bad ka sorkar India ba ia kane ka lynnong ban tih uranium dei ban kliap lama noh bad kim kwah ba kin khlie shi khlie ia kajuh. “Hynrei lada ka sorkar ka thmu ban leh da ka bor ban tih uranim jubor, ka seng ka la pynkhreh ban iakhun tyngeh,” ula bynrap.

U bah Lambokstar ula ong ba ka seng kan ieng ban pyrshah ia kane ka mat namar ba ka jingtih Uranium ka pynriew spah ia ka sorkar India katba ka pyniap ia ki trai muluk namar ka bih ba mih na kane ka dei tang ka jingpang jingshitom.

“Bunsien ka sorkar India kam ju khein snep ia ki ritpaid, hynrei lada ka sorkar ka pyrshang ban tih jubor ia u uranium na kane ka jylla, ka seng kan sa leh ia kaba donkam,” ula ong.

Ha kajuh ka por, u President ka KSU ula bynrap ba na ka liang ka sorkar jylla bad ka District Council kaba dei kaba iada ia ka khyndew ka shyiap, kidei ban tip ia ka kamram, namar ba bun ki bynta ha ka jylla ki hap ha ka khyrnit ba hynriew.

“Nga sngew ba kane ka OM ba thymmai ba wanrah ka sorkar India, kam dei ban kynthup ia ka jylla Meghalaya namar ba kim dei ki jaka jong ka sorkar hynrei bun ki jaka puta ki khyndew ki shyiap kidei jong ki riew shimet, ki iit ki hima, ka Raid, ki shnong,” ong u bah Marngar.