Ka jngiaid lynti ka ICAR ha ki 50 snem ka wanrah ka jingkylla ia ki nongrep, ong ki Lat

Ki bor ka Indian Council of Agricultural Research (ICAR) Research Complex for North Eastern Hill Region mynta ka sngi da ka jingkmen kaba khraw ki la ioh ban pynlong ia ka jingrakhe lyngkhuh dap snem kaba 50 lane ka jubili ksiar bad la plie ruh ia ka iew die lang ban pyninam jong ki nongrep lane ka Farmer’s Expo, ha kaba la wan ban plie paidbah da u Lat ka jylla u CH Vijayashankar, ha ka jingiadonlang ruh u Myntri Rangbah ka jylla u Conrad K Sangma, u myntri ba dei khmih ia ka kam rep ka sorkar pdeng u Shivraj Singh Chouhan. La wan ban sakhilang ruh ia kane ka jingrakhe da ka myntri ba dei khmih ia ka kam rep ka jylla Meghalaya ka Dr. Ampareen Lyngdoh, u Dr. Himanshu Pathak, Director General, ICAR & Secretary, DARE, Government of India, Bah D.P. Wahlang, Chief Secretary ka jylla, u Dr. Suresh Kumar Chaudhari, Deputy Director General (Natural Resource Management), ICAR, New Delhi nalor kiwei kiwei ki heh officer ka tnad ICAR ka thain shatei lam mihngi. Haba kren ha kane ka jingrakhe, u Conrad K Sangma, nyngkong eh u la ai khublei kyrpang ia ki bor ka tnad ICAR kiba da ka jingtreishitom bad ka jinglen lade ki ophisar kane ka tnad ka la lah ban jam sha u mawmer ba 50 snem ha ka jingshakri ban kyntiew ia ka kam rep kam riang hapoh ka thain shatei lam mihngi, da kaba kdew ruh, ba kane ka tnad ka long kum kawei na ki nongtbeh jingshai ban kyntiew ia ka kam rep katkum ka juk kaba mynta, ban wad bniah ia ki rukom rep rukom riang bad ban pynkylla ia ka jingim jong ki nongrep.

U la ai ruh ka jingiaroh, ia baroh ki ophisar, ki nongwad bniah jong ka tnad ICAR kiba la treishitom na kawei ka snem sha kawei pat, ban nang wad bniah kumno ban wanrah ia ka jingkylla ha kam rep kam riang lyngba ki jingpule, ki jingpyndonkam ruh ia ki kor ki bor jong ka juk kaba mynta ban nang pynjanai ia ka rukom rep ha kane ka thain khamtam ka jingnang pyndonkam ruh ia ka jingrep tynrai (Organic). Shuh shuh ruh, u la kdew ba kane ka thain, ka lah ban long kum kawei na ki shlem na bynta ki jingthung bapher bapher, ba kynthup naduh ki siej, ki jingthung ba khlem khleh dawai, ka jingpynmih ia ka ngap bad kiwei kiwei kiba ka ICAR ka la pynmyntoi ia kane ka thain, tangba dang donkam ban phaikhmat sha ki bynta kiba kham heh ka jingpynkylla ia ka teknoloji, ka jingiadei kaba biang nalor kiwei kiwei ki bynta ban nang kyntiew ia ka kam rep kam riang. Na ka liang u Shivraj Singh Chouhan, u la ai jingiaroh ia ka ICAR halor ka jingnang kiew na kawei ka por sha kawei pat, da kaba kdew ruh ba ka jylla Meghalaya ka long kaba riewspah halor ka jinglong jong ka mei mariang kumta ka donkam ban don ka jingiatreilang hapdeng ka ICAR bad kiwei kiwei ki tnad ba kynthup naduh ki skulbah Agriculture, ki KVK’s bad ka sorkar jylla ban nang pynjanai ia ka jingshakri ha kane ka thain.

Haba kren kum u kongsan, u Lat ka jylla u CH Vijayashankar, ula ai jingiaroh bad pynpaw ia ka jingkmen ban ia don bynta lang ha kane ka jingrakhe ia jingdap 50 snem ka jngiaid lynti ban shakri ha kaba ia dei bad ka kam rep kam riang jong ka ICAR kiba la trei shitom ban wanrah ia ka jingkylla dur ha kaba ia dei bad ka rep ka riang ka jingpynmih ia ki mar rep bad ka jingmyntoi jong ki nongrep. U la ong ruh, ba ka ri India hi ka dei kaba khein kor bha ia ka kam rep kam riang bad ka dei kaba don hapoh ka dohnud jong ki nongshong shnong bad ka roi ka par jong ka ri, kumta ka long kaba kongsan ban nang don ka jingiatreilang hapdeng ka sorkar pdeng ban nang kyntiew shuh shuh ia ka kam rep lyngba ki lad jingiarap ki skhim bapher bapher ban pynmyntoi ia ki nongrep kiba bun. “Kane ka thain, ka dei kaba riewspah bha ha ka jinglong jingman jong ka khyndew bad kaba pynmih bha ruh ia u sying, u synrai, ki jingthung dawai kynbat bad kiwei kiwei ki jingthung, kumta ngi donkam ban phaikhmat lang ruh kumno ban nang kyntiew ia kine ki mar rep ban wanrah ia ka iew kaba biang ban kyntiew ia ka ioh ka kot jong ki nongrep bad ka thain hi baroh kawei”, ong u CH Vijayashankar. Ka Droupadi Murmu, ka President ka ri India kaba khlem ioh ban wan shimbynta shuh ha kane ka jingplie ia ka jingrakhe ia ka jingdap 50 snem ka ICAR haba ia shim bynta pat lyngba ka jingkren lyngba ki kor Internet ka la ai jingiaroh bad ai khublei kyrpang ia ka ka ICAR bad ka thain lammihngi, halor ka jingiaid lynti jong kane ka tnad ban wanrah ia ka jingkylla ha ka liang ka rep ka riang bad ruh ban kyntiew ia ka kam rep bad ka kitbok kitrwiang ruh ba kane ka tnad kan nanglah ban ai ka jingshakri ba kham janai na kawei ka snem sha kawei pat ban kyntiew ia ka ioh ka kot jong ka ri hi baroh kawei.