Ka Jylla ka la thaw rekod ia ka jingkiew 10 percent ha ki lai snem: Conrad

Ka sorkar jylla hynne ka sngi ka la rakhe ia ka jingdap 54 snem ka jingioh jylla ha ka jingialang ha Baghmara, South Garo Hills District ha ka sien banyngkong eh.Ka jingrakhe ha Baghmara ka long shibynta ban ai burom bad pynsahnam ia u Myntri Rangbah banyngkong eh ka jylla u (L) Captain Williamson A. Sangma.U Myntri Rangbah ka Jylla u Conrad K. Sangma ula long kum u kongsan bad la donlang u Symbud Myntri Rangbah Bah Prestone Tynsong, u Myntri ka pule puthi u Bah Lahkmen Rymbui, u Chief Secretary ka jylla u Dr. Shakil P. Ahammed, ki heh ophisar sorkar, ki khynnah skul bad ki paitbah. Ka jingrakhe ka la sdang da ka jingrwai ia ka State Anthem da ka Khmih Choir, Shillong, la pynbud da ka jingpyni ia ka kolshor ki Khasi bad Garo bad la pynbna ruh ia ka Meghalaya Day Awards, Excellence Awards bad Governor’s Police Medals bad la sam ruh ia ki khusnam bapher bad la pyni ruh ia ka video Rise Meghalaya.

Haba kren ha ka jingialang u Conrad K. Sangma ula ong, ka rai ban pynlong ia ka jingrakhe ka jylla ha Baghmara ka long ban pynthikna ba kan ym don kano kano ka thain ha Meghalaya ka ban shah iehnoh ne shah kyntait bad kubur ba kane ka thaiñ ka la shah ieh la bun phew snem bad ka jingpyrshang ka la iaid shakhmat ban wanrah jingkylla.U Myntri Rangbah ula ong, ka Baghmara ka dei ka district basah u Captain Williamson A. Sangma, ka long ka jaka ba kordor ia kaba la thaw ia ka Meghalaya da ka jingiatylli, jingiaishah bad ka jingiakhun khlem ia um snam.U Conrad Sangma ula ong, ba ka Meghalaya ka la ioh ia ka rekod ha ka jingkiew kumba 10 per cent ha kine ki 3 snem ba la dep bad ka long kum kawei na ki jylla ba kiew sted hapoh ka ri bad ula ban jur ba ka roi ka par ha ka jingim ba man ka sngi ki paitbah ym ban panpaw tang ha ka jingkhein.

U Myntri Rangbah ula ai burom bad pynpaw ka jingsngewnguh ia ki nongialam kiba iakhun ban pynioh ia ka jylla bad ula maham pyrshah ia ka jingmih ka jingiapait iapra ha ka imlang sahlang, khamtam eh ha ki rynsan social media.Katba u Symbud Myntri Rangbah ka Jylla u Bah Prestone Tynsong ula ong, ka jingrakhe kan long ka jingsahnam ha ka histori bad ka kdew ba lehse ka dei ka sien ba nyngkong eh ia kane ka jingialang ba heh la pynlong ha Baghmara. U Bah Prestone ula kubur ka South Garo Hills ka dei kawei na ki district ba sahdien bad ula ong, ka sorkar ka la pynleit jingmut ia ka roi ka par ha ki jaka thain kyndong, khamtam ka jingpyniasoh lyngba ki surok bad bynrap ba ka surok Shillong–Baghmara la dep ban shna haduh 60 per cent.