Ka karkhana BEML ha Bengaluru, kan shna ki rel ‘Bullet train’ ba sted kum u kuli

Ka karkhana shna rel jong ka sorkar India kaba la tip kum ka Bharat Earth Movers Limited (BEML) mynta ka la pynkhreh ban shna ia ka Bullet train ne ka rel kaba iaid sted kum u kuli. Kane ka karkhana BEML ka sorkar India kaba don ha Bengaluru, Karnataka kaba la seng ha u snem 1964 mynta kala shna ia ki rel kiba ym pat donkam shuh ia ki nar steel ne kita kiba khot kum ki stainless rail. Nalor ki rel, ka BEML ka shna ruh ia ki Metro, ki tank ban iakhun thma, ki kali shipai, ki kali kit tiar thma bad kiwei de. Ka kynhun ki nongthoh khubor na Meghalaya ha ka jingialam ka PIB, kila ioh ban iakren bad ki ophisar bad u Director ka BEML, u Rajeev Kumar Gupta ha kaba ula iathuh ba ka kompeni ka dang pynkhreh mynta shaid shaid ia ka jingshna ia ka dur ka dar jong kane ka rel ha kaba ka jingsted jongka, kan long kumba 250km shi kynta bad ka India kan shna ia kane ka rel khlem da donkam shuh ban iatreilang bad kiwei ki ri hynrei ka lah ban leh hi.

“Kane ka long katkum ka thong ka sorkar India ban pyllong ia ka ri kaba la kiew la bit la biang ne Vikshit Bharat ha u snem 2047,” la iathuh ki heh ka BEML. Katkum ka jingiathuh kine heh ka BEML, ban shna ia kawei ka rel kaba heh ban kit briew kit tiar ka shim por kumba 2 snem eiei ban pyndep. Ka rel ka lah ban kit haduh 30 ton ka jingkhia bad ka jinglut ban shna ia kawei ka rel kan kot sha ka 10 klur eiei bad ka lah ban iaid haduh 30 snem eiei. Kine ki rel rit ne metro ki iaid iew bha ha ki sor bah ka ri India kum ha Bangaluru, New Delhi, Mumbai, Kolkata, Chennai. Ha ki jylla ka North East kaba lah ban pyndonkam ia kine ki rel ki dei ka Assam namar ba ka long madan katba ha ki jaka lum kum ka Meghalaya kan ym long kaba biang, la ong u Director ka BEML.

Ha kane kajuh ka sngi, ki nongthoh khubor na Meghalaya sha Bangaluru, Karnataka lyngba ka PIB, ki la ioh ruh ban iakynduh bad ban lum jingtip na ki scientists ka ISRO, kaba wad bniah ia kiba iadei bad ka haw haw. Haba kren sha ki nongthoh khubor ka Meghalaya, u Dr A K Anil Kumar, Outstanding Scientist Director, ISTRAC u la batai ia ka jingdonkam ki satellite kiba ai ka jingshakri ia ki jingdonkam jong ki briew naduh ha ka rep ka riang, ka jinglong ka suin bneng, bad ka jingpyndonkam ia ka kor internet. Ula ong ba mynta ki briew ki treikam da ka kor internet lyngba ki satellite bad lada sangeh treikam u satellite tang shiphang, ka pyrthei baroh kawei kan sangeh treikam bad hangta kan wanrah ia ka huri hura bad ka jingiakhih paidbah kaba shyrkhei. “Dei lyngba u satellite uba pynbiang ia ka jingsam jong ka jingiapyniasoh kylleng ka pyrthei ha kaba ha kane ka juk mynta, na India ki briew ki treikam ia ki kompeni na America, ka die ka thied, ka leit ka wan la shaniah ha kane ka bynta jong ka jingtreikam,” ula ong.