Ka khubor ba khadduh na u Dr Ricky Syngkon ka long ‘Good Evening Sir’ sngewbha peit ka jingthoh na bynta ka Institute …. ong u Conrad

Ka Iingdorbar Thaw Ain ka la pynsangeh ia baroh ki kam ba la buh jong ka Dorbar Mang Tyngka ha ka sngi Thohdieng namar baroh 60 ngut ki MLA, ba ialam da u Myntri Rangbah ka Jylla Conrad K Sangma, ki la ai burom khatduh ia u MP ka VPP na Shillong Dr Ricky AJ Syngkon, uba khlad noh ha ka miet sngi Palei ha Hospital ka nongbah Shillong.

“Kum ka dak ka jingburom ia u (L) Dr Ricky AJ Syngkon, baroh ki kam ba la buh mynta ka sngi la pynsangeh noh bad ngin don tang ia ka jingiakren ai burom ia uba khlad” pyntip u Lamphang Thomas A Sangma hapoh ka Iingdorbar.

U la bynrap ba ia ka calendar bathymmai jong ka Dorbar yn sa sam kham hadien.

U Myntri Rangbah ka Jylla Conrad K Sangma ula ai burom ba sngew myllung ia u MP ka Shillong Dr Ricky AJ Syngkon, haba pynpaw ba ka jingkhlad jong u ka dei ka jingduh kaba khraw ia ka Meghalaya.

“Da ka jingsngewsih ba jur bha ba nga ieng hangne mynta ban ai burom ia u (L) Dr Ricky AJ Syngkon” ula ong ha Iingdorbar, haba bynrap ba ka jingkyndit ka la wan ha baroh kawei ka Jylla.

U Conrad ula pynkynmaw ia ka jingiakynduh ia u Dr Syngkon dang 15 sngi ha shuwa, haba une u MP ula tyrwa ban pynkha ia ka National Institute of Social Defence ha Meghalaya.

“U da angnud shisha, kumta nga la kyrpad ia u ban phah sha nga da ka jingthoh, ia kaba u la pyndep. Ka khubor ba khatduh ka long “Good evening Sir, sngewbha peit ia ka jingthoh na ka bynta ka Institute ba phin bud dien” ong u Conrad.

“Nga kynmaw ia kane ka khyllipmat…u don ia ka main, ka akor bad ka jinglong lui lui….phi sngew ba u dei u paralok uba la rim bha”.

U la kren halor ka jinglong sngewrit jong u Dr Syngkon, haba kdew ia kawei ka jingjia haba une u MP ula wan poi sha ka jingialang jong ka skul St. Mary’s da kaba niah scooty.

“U Dr Syngkon-uba jai jai, sngewrit, u briew uba ngeit Blei bad uba aiti shisha ban leh ia ki kam ba bha na ka bynta u paidbah” ong u Conrad.

U Myntri Rangbah u pyntip ba u ioh jingtip ia ka jingkyllon jong u haba shong bishar ia ki kot ki sla jong ka mang tyngka ha ka miet sngi Palei bad mar mar ula phone ia ki Ophisar bad ki Hospital, hynrei la pynbna ba u Dr Syngkon ula iap ha Robert Hospital.

Kham hadien, u Conrad ula leit sha Hospital bad ki Symbud Myntri Rangbah, Bah Prestone Tynsong bad Bah Sniawbhalang Dhar lem bad ki MLA, bad hadien ki la synran ia kiba haiing haba pynkit ia ka met sha Pohkseh.

U Myntri Rangbah ula pynbna ruh ia ka shuti Sorkar ha baroh ki District jong ka Shillong Parliamentary constituency ha ka 21 tarik Rymphang namar ba ka lah ban dei ka sngi leit ontep ia une u MP ka Shillong.

“Ka dei ka jingduh kaba khraw ia ka Jylla baroh kawei…..kane ka dei ka jaka kaba thylli kaba eh ban pyndap biang” ula ong haba pynpaw ia ka jingsngewlem sha ki ba haiing bad nongkyrshan haba duwai ba kin ioh ia ka bor bad ka jingpyntngen ha kum kane ka por ka jingduh.

Haba iasnohkti lang bad u CM, u Nongialam ka Liang Pyrshah Mukul Sangma ula ong ba kane ka dei ka jingduh ka bym lah shuh ban pyndap ia ka Jylla.

“Nga pynpaw ia ka jingsngewlem naduh ka mynsiem sha baroh kiba don jingiadei bad u, ki paralok, kiba iatreilang bad baroh kito kiba ieid ia u” ong u Mukul.

Haba pynkut ia ka jingai burom, u Mukul ula duwai ban ai ia ka bor sha ka longiing ba shah ktah : “U Trai u don hajan ïa kiba la pait dohnud, bad to U Blei Uba donbor baroh un tap ïa uwei pa uwei na ki para jong u Dr Ricky uba la khlad noh bad ïa baroh kiba ieid ba thoiñ kiba la ïajan bha bad u.”

Ha kane ka sngi bun ki dkhot ka iing Dorbar ki la shim bynta ban ai jingkhublei khadduh ia u Dr Rickey AJ Syngkon bad pynpaw ka jingkhlad noh jong u ka long ka jingduh ba khraw ia ki paidbah bad jylla baroh kawei.