Ka khynnah ba sei ksaiñ na ka ngap,ka don ha Ganes Das ban shah sumar

Ka Medical Superintendent jong ka Mawkywat Civil Hospital, ka Dr. Marinsha Lyngdoh mynta ka sngi ka la pynthikna ba ka video kaba la saphriang stet ha ki social media bapher bapher ha ka jylla Meghalaya bad shabar ka jylla ruh kumjuh ha kaba la iohi ba kawei ka heprit kaba dang 5 snem ka rta ka la shah sumar ha ki doktor da kaba sei ia ki khniang na ka liang kamon jong ka ngap jong ka, kadei kaba la sumar hapoh Mawkyrwat Civil Hospital, South West Khasi Hills District.  Haba ïakren bad ki lad pathai khubor mynta ka sngi, ka Dr. Lyngdoh ka la pyntip ba ïa kane ka khynnah kynthei kaba dang rit ka rta la wanrah sha Mawkyrwat Civil Hospital ha ka 2 tarik Nohprah, 2024 ha kaba la pynrung mardor ïa ka da u doktor uba don duty ha katei ka por hadien ba u la ïohi ïa ka jingshitom ka khynnah. Ka Dr. Lyngdoh u la ong ba katei ka khynnah rit ka la shitom na ka

 daw jong ka jingmong bad jingmynsaw ha ka liang kamon jong ka ngap jong ka la kumba lai bnai eiei, bad ki kmie ki kpa ruh ki la pyrshang ban ioh jingsumar na shane shatai, hynrei ka la nang kham sniew ha kaba ka la ioh pang bad ka la sdang ban saphriang sha kiwei pat ki bynta jong ngap jong ka, bad kumta ki doktor ki la rai ban sumar ia ka ha kaba la weng noh ia ki khniang na ka ngap jong ka, bad ha ka sngi kaba bud la phah ia ka sha Shillong na ka bynta ka jingsumar kaba kham bha.  Ka MS ka la ong ruh ba ha kaba ia dei bad katei ka video, la thmu ban ring khnang da ki doktor kum ka rekod jong ka jingsumar bad ruh ban pyndonkam ha kaba hikai, hynrei ha kaba iadei bad ka jingsaphriang jong katei ka video ka lah ban jia katba ki dang iasam hapdeng ki para ba iatreilang ha kaba iwei na ki i la iasam ia ka bad kiwei pat ki para ba iatreilang ne bad ki paralok.

“Kumta halor kane ka jingbakla jong ka kynhun jong nga, kaba long ka jingpynkheiñ ïa ka hok ban im shimet jong ka nongpang, nga la shimkhia bha bad nga la kren ruh sha ki nongtrei ba kum kine ki jait jingjia kim dei shuh ban jia hadien habud,” ong ka Dr. Lyngdoh kaba la pan map ruh na ki kmie ki kpa bad kiba haïing hasem jong katei ka khynnah. Na ka liang jong ka MS ka la khot ruh ia ki paitbah jong ka district ba lada ki don kano kano ka jingmynsaw ki dei ban leit shah sumar mardor ha ki doktor ba tbit khnang ban lait na ki jingeh, bad kumjuh ruh ban leit sha kiwei pat ki jaka sumar ba kham halor lada jia ba kam iarap. Kane ka khynnah kynthei kaba dang 5 snem ka rta ka dei ka khun jong u Bah Royalpantila Khyllem Kharai bad ka kong Overjoy Jyrwa na ka shnong Mawbidong, South West Khasi Hills District, bad kumba ka long mynta ka dang don hapdeng ka jingsumar ha Ganesh Das Hospital, Shillong.