Ka kot Memories of Seven Campaigns kaba iathuh iaka jingialeh ba shisha u Kiang Nangbah : MP Rajya Sabha

Haka jingialang kynmaw burom iaka lyngkhuh sngi iap ba 162 u woh Kiang Nangbah Khlawait ka Rilum Jaiñtia ba pynlong daka seng Kiang Nangbah iasiat Khnam Memorial Society ha ka 30/12/24 ha Kiang Nangbah Memorial Park, Madiah Kmai Blai Syntu Ksiar, naka liang u Dr.W.R. Kharlukhi MP Rajya Sabha haba kren kum u kongsan u iathuh ba kawei ka kot ba kyrteng Memories of Seven Campaigns kaba u ioh  na uwei u paralok Doctor jong u bad sha ka Seiñraij ruh ula dep phah lyngba ka WhatsApp, dei ka kot kaba iathuh iaka khana ba shisha halor ka jingiakhun u Kiang Nangbah bad ka sorkar phareng haka thaiñ jong ngi. U ong ba don bun ki jingthoh ba ioh naki kot sorkar tangba kane ka Memories of Seven Campaigns dei kaba iathuh iaka khana ba shisha. Haka por ba iakhun u woh Kiang Nangbah pyrshah iaka sorkar phareng la iap haduh 200 ngut ki shipai phareng ha Ri Jaiñtia bad  3 ngut ki sahep phareng. Nangta ka jingiap haduh 200 ngut dei ba kila wad  bun ki lad kumno ban ioh kem ia u khun dap shynrang ka Ri, hynrei haba khatduh  dei ki briew jong ngi hi ba don bynta ki phareng kila ioh ban kem ia u Kiang Nangbah.

Haka jingiadei bad ki kyntien ba ong u Kiang Nangbah shwa ban iap “Lada ki khmat jong nga ki phai sha mihngi ka Ri jong nga kan ioh laitluid”, u Dr. W.R. Kharlukhi u kubur ia kane namar ha u 1947 ioh laitluid ka Ri bad ha u 1972 la ioh iaka Jylla ba pura kiba pyni bala urlong shisha ki jingkren jong u. U ong ruh ba u Kiang Nangbah dei uba la kren shwa ia kaei ban jia, u Blei ula ai ha u ka sap ban iohi jngai, bad ymdei ba u shu iap hynrei ka jingiap jong u  ka pynim pat iaka jaitbynriew. Ha kane ka sngi u Dr W.R.Kharlukhi ula kular ruh ban ai 10 lak sha ka seng Kiang Nangbah iasiat Khnam Memorial Society khnang  ba kan ioh pyntreikam iaki jingthrang jingangnood ha kane ka jaka ba don ruh u mot sahnam u woh Kiang Nangbah.

Shwa kane la  ioh ruh ka jingkren na u President ka seng u C.Najiar, na u Shape Paswet Vice President, na u Riquo Rq Laloo EC member, ka jingnguh Blei na u Barlee Moree Shylla. La don ruh ka jingbuh syntiew  ha trai u mot dur u Kiang Nangbah bad pynher iaka lama, ka jingsam prize sha ki nongjop haka jingiakop iasiat khnam jong ki kyrdan bapher bapher nalor  ki jingshad jingrwai bad kiwei.