Ka Kot Umpohliew: Ka jingshemphang ban kyrsiew ia ki Sur Tynrai ka ktien Khasi

Ka Martin Luther Christian University (MLCU) Press ka la pynmih paidbah ïa ka kot Umpohliew: Ka Jingshemphang kaba dei ka jingthoh poitri ha ka ktien Khasi da I Kong Sbunbha Kharumnuid ha ka jingialang ban rakhe ïa ka ktien bad ka kolshor Khasi. Ka Dr Larilin Kharpuri, Pro Vice Chancellor bad ka nongpeit jong ka MLCU Press, ka la plie ïa ka jingïalang bad pdiang ïa u kongsan Bah Kitborlang Syiem MDC Nongkrem, u symbud kongsan Fr. Suresh Kagoo, ka nongthoh Kong Sbunbha Kharumnuid, Kong Patricia Mukhim bad u Vice Chancellor Dr A.A. Mao, ryngkat bad ki ophisar, ki nonghikai, ki nongtrei bad ki samla pule jong ka skulbah. Ka la pynpaw ruh ba ka Umpohliew: Ka Jingshemphang ka dei ka kot banyngkong ha ka ktien Khasi ba la pynmih da ka MLCU Press kum ka dak ka jingiaid lynti jong ka skulbah. U Fr Suresh Kagoo, Parish Priest Jongksha, ula pynpaw ïa ki jingkynmaw halor ka jingtip jong u ïa ka nongthoh bad ïa ka iing ka sem jong ka naduh u snem 1984. Ula batai ïa ka jingim jong ka Kong Sbunbha naduh ka jingtrei shitom kum ka nongdie ha surok haduh ban da long ka nongthoh poetri, kaba pyni ïa ka jingkmen bad ka jingjop halor ki jingeh.

Ula ong ha ka pyrthei pule kyrdan PhD, ka jingpynmih kot lane ka jingpynmih jingthoh ka long kaba donkam bha, hynrei ka Kong Sbunbha da ka jingnang ba duna ka la pynmih ïa ka kot jong ka, kaba pyni ïa ka sap bad ka mynsiem shitrhem jong ka.Kumjuh ka kong Patricia Mukhim, Board Member jong ka MLCU bad Editor The Shillong Times, ka la pynkynmaw kumno ka la ia kynduh ïa I Kong Sbunbha ha ïew bad kumno ka la pynshlur da ka jingriewblei bad ka jingsngewlem jong ka. Ka la pynpaw ruh ba ka nongthoh ka don ïa ka bor ban iohi ïa ka jingitynnad ha ki jingim ba rit bad ban pynpaw ïa ki jingsngew bad jingshem ha ka dur poitri kaba don burom. Ha ka jingkren jong ka Kong Sbunbha  Kharumnuid ka la ai nguh ia U Blei, ka MLCU Press bad kiwei pat baroh ba donkti ha ka jingpynmih ïa kane ka kot. Ka la ong ba ki jingthoh jong ka ki dei ban long ka jingsngew shlur ïa kiwei pat bad ban pynpaw ïa ka jingim ba skhem.

Ia kane ka kot la pyllait da u Bah Kitborlang Syiem, MDC ka Nongkrem Constituency bad u samla pule barim ka MLCU ha ka Tourism Department ha u snem 2012.Ha ka jingkren ula ai khublei ïa ka MLCU Press halor ka jingtrei shitom bad ula pynpaw ka jingsngewnguh bad ka jingkyrshan ia ka nongthoh halor ka jingsngewlem bad ka jingtrei shitom jong ka.Katba u Bah Baphrangdor Thangkhiew na ka MLCU Press ula ai ki kyntie khublei bad ïa ka jingïalang la pyniaid da ka Dr Badalamshisha Dkhar, Director jong ka Centre for Tribal Knowledge and Practis, MLCU. Umpohliew: Ka Jingshemphang ka long kum ka dak jong ka jingkyrshan jong ka MLCU Press ban pynskhem bad pynneh pynsah ïa ka ktien Khasi, bad ban kyrsiew pat ïa ki sur bad jingmut jong ki nongthoh tynrai jong ka ri.