Ka kyrsu ka lahduh ha ka folk song bad folk dance ka KA EWKHDL – CMYEP, 2025

Ka Kyrsu Musical and Cultural Society na Kynshi kala ïoh ban rah ïa ka nam lahduh ha ka Folk Song bad Folk Dance ha ka Eastern West Khasi Hills District Level Chief Minister’s Youth Engagement Program 2025 bala pynlong da ka ophis ka District Sport Officer ka West Khasi Hills bad ka office ka Deputy Commissioner ka Eastern West Khasi Hills District. Ïa kane ka program ba ar sngi bala pynlong ha Auditorium jong ka 14-8 College Mairang, halor ka phang kaba ong Empower Youth, Empower Meghalaya, la wan ban pynhap pyrda da ka Deputy Commissioner ka Eastern West Khasi Hills District ka kong Anita Kharpor kum ka kongsan, kaba la ïoh ruh ban sam ïa ki khusnam sha ki nongjop ha ki jingïakob bapher bapher.

Lah ban pynkynmaw ba ki nongjop ha ki jingïakob bapher bapher na kane ka program kin ïoh ban mihkhmat ï aka Eastern West Khasi Hills District sha ka State Level Chief Minister’s Youth Engagement Program 2025 ka ban sa long ha Nongbah Shillong naduh ka 1 tarik nohprah haduh ka 5 tarik nohprah 2025. Ka kong Anita Kharpor kala ong ba ka jingithuh ïa ka Eastern West Khasi Hills District kum kata ka Arts District ka da i shongnia haba peit ïa ki sap ki phong ba ki samla kila ïoh ban pyni lyngba kane ka prokram. Kala ong ba kane ka prokram ka dei ka rynsan ïa ki samla ba kin lap bad shem ïa ka sap ka phong ba ki don bad ban pynpaw ïa kata ka sap sha ka pyrthei.

Ka Kong Anita kala ai mynsiem ruh ïa ki nongjop ha ki jingïakob bapher bapher ba kin leh bha shuh shuh sa ha ka state level khnang ba kin ïoh ban ïakhun haka National Level. Kala ong ruh ba ka da angnud ban ïohi ïa ki samla ka district ba kin jop ha ka state bad National Level bad kala kyntu ruh ïa baroh ban ïai pyneh ïa ka Eastern West Khasi Hills District kum kata ka Arts District ha ka jylla.