Ka MeECL ym tang ban pynmih bording, ka dei ruh ka shlem ai jinghikai ia ki khynnah

Ka Meghalaya Energy Corporation Limited (MeECL) ba la ju tip mynshwa kum ka Meghalaya State Electricity Board (MeSEB) kam dei tang ba ka pynmih bording ilektrik ha Jylla, hynrei ka don ruh ki shlem ai jinghikai ia ki khynnah ban kyntiew ha ka pule puthi kumba long kiwei ki kompai ha kiwei ki jylla.Ka MeECL ka don lai tylli ki shlem ai jinghikai ha Ri Bhoi District, ba la tip kum ka Umiam MeECL Secondary School, Sumer bad Kyrdemkulai Secondary School, kine ki skul kim dei tang na bynta ki khun jong ki nongtrei ka MeECL hynrei ki ai jinghikai ia baroh ki khynnah ha ka thain khamtam ki khynnah ba wan na ki longiing ba duk ha ka thain.

Haba kren bad ka Head Mistress jong ka Umiam MeECL Secondary School, ka la iathuh ka skul ha Umiam ka don palat 400 ngut ki khynnah skul kynthup naduh ka klas A-rit haduh klas ten bad ki khynnah na kylleng ka thain kiba wan pule ha katei ka skul.Halor ka jingkylli ka la iathuh ki la phah jingthoh sha ki bor ba dei peit ba la donkam ia ka iing skul thymmai, namar katei ka iing skul ka dei kaba la rim bad ka la bynrap ba kane ka skul ba pyniaid da ka MeECL kam don bynta bad ka sorkar Jylla.

Kane ka skul la seng naduh u snem 1963, kata naduh ka por ba synshar ka sorkar Assam hynrei kaba lyngngoh ka long haduh mynta kam pat ioh ka iing skul ba biang kum kiwei kiwei.Kum ban pynpaw kine ki shlem ai jinghikai ki wan shakhmat ha ka resul matrik ha ki snem ba la dep hynrei kum ka Sumer bad Kyrdemkulai Secondary School, hynrei ha kine ki khyndiat snem kim shym la lah ban pynpaw shakhmat.