Ka Meghalaya ka dei ban ioh IAS Cadre la ka jong:CM

U Myntri Rangbah ka Jylla Conrad K Sangma hynne ka sngi ula shim bynta ha ka jingalang ba shisien shisnem jong ka Meghalaya Civil Service Officer’s Association (MCSOA) kaba long ha State Convention Centre, Shillong bad ula pynapw ba ula tynruh bad buddien bad ka Sorkar Pdeng ban ai noh la ka jong ka Meghalaya IAS cadre. Haba kren ha ka jingialang u Myntri Rangbah ula ong, ba ula buddien ban pynioh la ka jong ka Meghalaya IAS cadre naduh u snem 2019 bad u kyrmen skhem ba ka jylla kan sa ioh shen ia kane ka jingdawa ban pynbeit ryntih ia ka kyrdan MCS na ka bynta ki kam ban shakri paidbah.

 U Conrad ula ai iaroh ia ki ophisar MCS ba la trei met bad mynsiem ha ki kam ba la bynshet ban pynkhlain ia ka rukom treikam ban shakri ia ka jylla. “Baroh ngi iatrei na bynta ka juh ka thong, kata ban shakri ia ki paidbah ka jylla. Ym don satia ki kam, ym don satia ki polisi treikam, ym don satia ki rai kiba don jingmut lada ngim pynkynmaw ia lade ba ka thong jong ngi ka long ban wanrah ia ka jingiapher ba sngewtynnad ha ka jingim ki paidbah,” la ong u Conrad bad kyntu ia ki ophisar ba iai bteng ban trei kham bha namar ka kyrdan ka lah ban kylla hynrei ka jingthmu bad ka thong ka dei ban neh beit kumjuh.

Ha kane ka jingialang la ioh ruh ia ka jingkren na u Commissioner & Secretary ka Sorkar Jylla u Bah Cyril V Diengdoh, u President ka Meghalaya Civil Service Officer’s Association u Ashish M Sangma bad kiwei ki heh ka sorkar jylla.