Ka Meghalaya ka jylla rit paid donkam ban iada: Grace Mary Kharpuri

Ki nongialam jong ka National Peoples’ Party (NPP) hynne ka sngi ka la kynmaw burom ia ka lyngkhuh sngi iap ba 190 jong u Paiem Tirot Sing ba long ha State Central Library, Shillong. Ha kane ka sngi ki nongialam ba la wan iashim bynta ki kynthup u MLA ka Jowai u bah Wailad Shylla, u bah HM Shngpliang, u bah Hamlet Dohling, ka kong Grace Mary Kharpuri nalor kiwei de. Haba kren ha kane ka sngi, ka kong Grace Mary ka la pynkynmaw ia ki kam ba rad bah jong une u riewkhraw uba la ieng ban iakhun ban pynlaitluid ia ka ri na ka jingshah synshar ha ki dohlieh. “Une u riewkhraw na ka Hima Nongkhlaw ula len ialade na bynta ban iada ia ka jaidbynriew, khlem da shongthait bad ula iakhun tyngeh ban pynlaituid ia ka ri bad ka jaidbynriew,” la pynkynmaw ka kong Grace kaba dei ka MDC ka Nongskhen.

“Nga ngeit skhem ba kata ka mynsiem jong u Tirot Sing kan nang iai tawiar ha ka ri bad jaidbynriew bad kin mih buh ki Tirot Sing ki ban don ka mynsiem ban ieit ia ka ri bad ka jaidbynriew, ym da kaba ialeh thma da ki tiar hynrei da ka lynti ban tehsong ia ka jaidbynriew,” la bynrap ka kong Grace.Ka la ong ba ka jylla Meghalaya ka dei ka jylla ba rit paid, namarkata donkam ban iada, khamtam ha kine ki sngi ka sain pyrthei ka la hiar dor sha ba palat ha kaba ym don shuh ka jingiatylli ne ka jingia burom markylliang. “Ka sain pyrthei ha kine ki sngi ka la hiar dor sha ba palat ha kaba ym don shuh ka mynsiem ban ia burom markylliang bad kam don shuh ka jingiatylli. Ki sain pyrthei mynta ki la shu kwah jubor ia ka bor ia ka burom,” ka la ong.

Ha kajuh ka por, ka kong Grace ka la iaroh ia u Myntri Rangbah ka jylla bad ka kynhun Myntri sorkar kiba la lah ban trei ia ka jylla hynrei don ki katto katne kiba ju mlien ban kynthoh ia ka sorkar. Ka la bynrap,“ Kane ka dei ba ngim pat laitluid haduh mynta ki sngi na ka jinglong kaba teh khum teh song ia ngi ban don ia ka mynsien pihuin. Ynda ngi la lait na kine ki jinglong, ka ri bad ka jaidbynriew kan sa laitluid bad kan sa tyngshain.”