Ka Meghalaya ka paw nam ha pyrthei na ka jain Ryndia ha Ri Bhoi: Bah F.S. Kharkongor

Ban kyntiew ia ka kam thain jain bad ka kam thir ksai ha ka thaiñ Ri Bhoi, kaba la paw kum kawei na ki jaka ba pawnam ha ka jylla ha ka jingpynmih ia ka jain ryndia, ka ophis jong ka District Handloom Officer, Ri Bhoi ka la pynlong ia ka prokram kyrpang kaba la ai kyrteng “Looms & Links.”

Kane ka prokram ka dei ka rynsan ban kyrshan bad kyntiew ia ki nongthain jain bad ki nongthir ksai, bad ruh ban pyni paidbah ia ki jain ba ki thain lyngba ka iew pyni nam kaba ar sngi.

Ia kane ka prokram la wan ban plie paidbah da u Principal Secretary ka tnad Textile ka jylla, u Bah F.S. Kharkongor, kum u kongsan ha ryngkat ka jingdonlang u Deputy Commissioner ka Ri Bhoi, u Abhilash Baranwal, kum u symbut kongsan ha kaba la synran lang da ka Director ka tnad Handloom, ka Kong M.R. Lywait, ka Zonal Head ka tnad Handloom, ka Kong Monica Lyngdoh, u Fashion Designer ba paw ha ka jylla, u Bah Daniel Syiem, ka District Handloom Officer ka Ri Bhoi, ka Kong D.P. Taraing, nalor kiwei ki ophisar ka tnad Handloom, ki Self Help Group (SHG) bad ki nongthain jain na ki shnong bapher bapher ka district.

Haba kren ha kane ka sngi, u Bah F.S. Kharkongor u la ong ba ka jingpynlong ia kane ka prokram ka dei kawei na ki sienjam jong ka sorkar jylla ban ai lad ia ki nongthain jain ba kin lah ban pyni paidbah ia ki jain ba ki thain bad ban ioh ruh ka lad ban pyniaid iew ia ki sha ki nongthied. U la ong ba kum kine ki rynsan ki long kiba donkam eh namar ki ai lad ia ki nongthain jain ban kyntiew ia ka kamai kajih bad ban pynkhlain ia ka jingim jong ki longïing.

U la pynpaw ruh ba ka jylla Meghalaya ka la ioh ia ka nam ha ka pyrthei hadien ba ka jain ryndia kaba pynmih ha jylla khamtam ha Ri Bhoi ka la ioh ia ka GI Tag (Geographical Indication Tag). Kane ka jingioh ia ka GI Tag ka pynshisha ia ka jinglong kyrpang bad ka jinglong trai jong kane ka jain, kaba pyni ruh sha ka pyrthei ia ka sap bad ka jingstad ki nongthain jain ka jylla.

Shuh shuh u Bah Kharkongor u la ong ba da kaba pynlong ia kum kine ki prokram kan don ka jingïakren bad jingïatai hapdeng ki nongthain jain, ki fashion designer bad ki paidbah ban wad ki lad ki lynti kumno ban nang pyniaid iew ia ki jain ba thain, khamtam eh ka jain ryndia. U la bynrap ruh ba kane kan iarap ban wanrah ia ki jingpynkylla thymmai ha ka rukom shna bad thain jain khnang ba kin lah ban iaid ryngkat bad ka por bad ki jingdawa jong ka iew.

Kane ka prokram “Looms & Links” ka la long ruh kum ka rynsan ban pyni paidbah ia ki jain bapher bapher ba thain da ki nongthain jain ka district, ha kaba ki nongwan peitkai bad ki nongthied ki ioh ban sakhi ia ki rukom thain jain tynrai bad ki rukom pynwandur thymmai. Ka la plie lad ruh ia ki nongthain jain ban ia kynduh bad ki nongdie, ki designer bad ki paidbah, kaba long ka sienjam ban kyntiew ia ka kam handloom bad ban pynneh pynsah ia ka kolshor bad ka riti dustur jong ka jylla Meghalaya.