Ka Monolith Festival ka dei ka rynsan ban pyni ia ka kolshor tynrai ki hima ki raid”

Ka Executive Committee ka KHADC hynne ka sngi ka la pdiang ia ka jingtyrwa ki MDC ka liang pyrshah ban pynlong ia ka Monolith Festival ne ka Tamasa Mawbynna. U CEM u bah Tony Winston Lyngdoh ula ong ba ka EC kan bteng bad kan pynbha ia kane ka tamasa Mawbynna. Ia kane u CEM ula pyntip ha ka kynta jong ka jingiatai ba la wanrah da ka MDC ka Nongpoh ka kong Rona Khymdeit halor ka mat ka jingdonkam ban pyllong ia ka Monolith Festival. “Ngin pyllong ia kane ka Monolith Festival bad ki nongiashim bynta ha kane ka tamasa kin wan da ka mynsiem ka jingkylluid bad ka jingkmen bad kan long ruh kaba shongkun,” ong u CEM.

Ula mynjur ba ka EC kan sa thaw ia ka Committee ban don bynta lang ia baroh ban ia ai jingmut ban pyllong ia kane ka tamasa.Ha shwa kane, ka MDC ka Nongpoh ka kong Rona khymdeit ka la ong ba ka Monolith Festival kam dei ka tamasa hynrei kadei ka jingiakynduh lang kaba kyrpang ne ka ‘Secret Meeting’ jong ki Raid bapher bapher ban pynneh pynsah ia ka riti dustur.Ka la iathuh ba tang ha Nongpoh kidon shibun ki raid bad ar tylli ki Hima. “Ka monolith kam dei ka jingleh sngewbha ban pyllut ban iadih buaid hynrei ka dei ka rynsan ban ai lad ia ki nongshong shnong ban iakynduh ban pyni ia la ka kolshor,” ka la ong.

Ka la bynrap ba wat la ka ktah ia ka jinglut jingsep ka Council hynrei ka la ai jingmut ba lada ym lah ban pyllong man u snem hynrei shisien ha ka ar ne lai snem dei ban pyllong ia kane ka tamasa Mawbynna.Ka la kyntu ia ka EC ba lada don ka lad ban pyrkhat ban shna da ka Committee ban pyllong ia ka festival.“Lada ka council kan pyllong na ka por sha por, kan long kaba ai jingmyntoi bad la kyntu ban thaw lad khnang ban pynim ia ka festival na bynta ban pynneh pynsah ia ka riti dustur,”ong ka kong Rona.Ha kane ka jingiatai la shim bynta lang da u MDC ka Laban u bad Ricky Shullai, u MDC ka Sohra u bah Tistos Chyne.