Ka MPLAD skhim ban kyntiew ia ka pule putthi

U Member of Parliament (MP) ka Rajya Sabha u Dr WR Kharlukhi hynne ka sngi ula plie ia ka kamra klas thymmai ka College of Teacher Education (PGT) Shillong ba la bei tyngka da ka Members of Parliament Local Area Development (MPLAD) Scheme 2024–2025. Haba kren ha ka jingialang u Dr Kharlukhi ula ong, ka MPLAD Scheme ym dei ban shim ka dei ka jingleh sngewsynei hynrei ka dei ka jingkitkhlieh bad ka kamram u nongmihkhmat ban kyntiew ia ka pule puthi hapoh ka Constituency.

Ula iaroh ia ka College kaba la bteng ia ka jingtrei shitom ban ai jinghikai ia ki nonghikai bad ka jingnoh synniang sha ka imlang sahlang lyngba ka jingai ia ka jingpynkhreh kaba paka ia ki nonghikai bad ula kyntu ia ki bor pyniaid jong ka College ban leit iakynduh ia u Myntri Rangbah ka jylla ban ioh jingkyrshan shuh shuh ban pynkhlain ia ki jingtei bad ki prokram ki ban iaid ryngkat bad ki jingdonkam ha ka pule puthi. Katba na ka liang ka Principal ka Dr Bahunlang Tron, ka la pynpaw ia ka jingsngewnguh ia u Dr Kharlukhi bad pynpaw ia ka jingieng skhem ka jingiohi jngai jong ka College ban don ia ki jingpule ki bapher bapher ba la don ia ki tiar ba kongsan ban pyntreikam pura ia ki kyndon ka National Education Policy (NEP) 2020.

Nalor kane ka la pynpaw ruh ia ki jingeh kiba mad ha ka jingthmu ban wanrah ia ka jingkylla ha ka College bad ka la kyrpad ban ioh ia ka jingiatreilang na ka sorkar bad kiwei kiwei kiba don bynta lang ha ka kam, ka ban long ka jingiarap ha ban pynurlong ban wanrah ia ka jingkylla.