Ka NABARD ka la kyrshan ban kyntiew ia ki thain nongkyndong

Ka NABARD Meghalaya Regional Office ka la pynlong ia ka Meghalaya Cooperative Conclave ha State Convention Centre, Shillong bad kumjuh la pynhap pyrda ia ka jingrakhe International Year of Cooperatives (IYC) 2025 kaba la long ha ka 9 tarik u Nohprah. Ia kane ka jingrakhe la pynhap pyrda da u Myntri ka tnad Cooperation ka sorkar jylla u Bah Methodius Dkhar kum u Kongsan ha ka jingdonlang u Richard Yanthan u Registrar of Cooperative Societies, ka Kong Joan R Blah, General Manager (OIC) NABARD, ki heh na ka Registrar of Cooperative Societies, Meghalaya Cooperative Apex Bank, MBMA, NCDC, Urban Cooperative Banks, PACS, IVCS, FPO bad ki kynhun bapher bapher.

U Bah Methodius Dkhar ula kdew ka kamram jong ki Cooperative Society la ka long ha ka rep ka riang, jingkyntiew ia ka kamai kajih ha ki thain nongkyndong bad ka jingpynkhlain shuh shuh ia ki jingtreikam kum ha ka ri masi khem dud, ri dohkha bad ka kam thain jain. U la iaroh ruh ia ki sienjam kiba la shim da ka NABARD bad ka jingkyrshan ia ki thain nongkyndong bad ula kyntu ia ki kynhun bad ki seng bapher ba kin pyntreikam ia ki kor ki bor khnang ba kin lah ban pynjur shuh shuh ka jingmih bad ba kan don ruh ka jingkiew sted ha ki kam pynroi. Ka Kong Joan R Blah, ka la pynshai ia ka sienjam ba ka NABARD ka la shim khamtam eh ban kyntiew ia ka rukom treikam katkum ka juk mynta ia ki cooperative lyngba kita ki cloud-based CBS, kor digital bad ruh ka jinghikai kaba kyrpang ban pynkylla dur ia ki PACS.

Katba u Richard Yanthan, ula ban jur ia ka jingdonkam ban don ka jingiatreilang hapdeng ki kynhun treikam na ka bynta ban pynkhlain shuh shuh ia ki cooperative bad ruh ban don ki lad ki lynti kumno ban iarap na ka bynta ban tehlakam ia ki jingma kiba lah ban ktah ia ka rep ka riang na ka jingkylla ki bor ka mariang. Ki riew shemphang ki la ai jingpynshai halor kiba bun ki mat, ki khana ba seisoh ha ka rukom treikam jongki FPO bad SHG, bad ka jingsam ia ki khusnam sha ki IVCS kiba treikam bha kiba la pyntreikam ia ki ePACS.