Ka National Symposium ha ICAR ban pyninam tiar thain kti

Ban pyninam ia ki jingthain bad ki jingshna kti bapher bapher bad ruh ban nang ai mynsiem ia ki nongthain jain na kylleng ki jylla ka ri India, ka College of Community Science, Central Agricultural University (Imphal), Tura, Meghalaya, ha ka jingiatreilang bad ka ICAR-NINFET Kolkata, ICAR-CICR Nagpur, Deendayal Research Institute, and ICAR-CRIJAF Barrackpore, ka la plie pyrda ia ka National Symposium kaba la jer kyrteng “Threads of Heritage: Exploring Traditional Textiles and Natural Fibres” naduh ka 27 haduh 29 Kyllalyngkot, ia kane ka prokram la pynlong hapoh ka phylaw jong ka College of Post-Graduate Studies in Agricultural Sciences, Umiam, Ri-Bhoi District.  Ha ka sngi ba la plie pyrda ia kane ka prokram, la wan ban shim bynta da u Myntri Rangbah ka jylla Meghalaya, u Conrad K Sangma, ha ka jingiadonlang ruh ka Archana Chitnis MLA na Burhanpur (Vidhan Sabha Constituency) kaba la bat ruh kum ka Myntri ka tnad pule ha katei ka jylla, u Atul Jain, General Secretary jong ka Deendayal Research Institute, u Dr. Jyoti Vastrad, Dean ka College of Community Science, CAU, Tura, u Dr. A Mishra, Vice Chancellor ka CAU, Imphal, nalor ki nongthain bad ki nongshna kti na kylleng ki jylla ka ri India.

Haba kren ha kane ka sngi, u Conrad K Sangma, u la pynpaw ia ka jingkmen ban ia don byntalang ha kane ka prokram kaba pyninam bad ban kyntiew ia ka kam thain bad ruh ka jingshna kti bapher bapher kiba mih na kylleng ki jylla jong ka ri India, da kaba kdew ruh, ba ka kam thain ka dei kawei na ki kam kaba long tynrai bad kaba riewspah hapoh ka jylla Meghalaya, u la bynrap, ba ki nongthain ne ki nongshna ymtang ba ki pynmih ia ki jain ne ki tiar, hynrei ki thain ne ki shna ia ki riti dustur kiba pynpaw pat lyngba ki ksai ia kaba donkam ban pynneh pynsah ha kane ka juk ba mynta. U la pharia ruh, halor ka jinglong kyrpang halor ka sap thain jingthain lyngba ki ksai bad ka jingthain u mynbarim haba thain ia ki jingkieng jri hapoh ka jylla, ha kaba ki pateng jong u Khasi bad Jaintia kiba la pynlut bha ia ka por bad ka bor ban thain ia ki thied jri ban tei ia ka jingkieng jri kaba janai da kaba kdew kyrpang ia ka shnong Siej kaba u la iakynduh ia u wei u rangbah u ba la sdang kyrpang ia ka jingkieng jri la 60 snem kaba dang khlain bad kaba pynpaw ia ka jinglong tynrai.

Shuh shuh ruh, u Myntri Rangbah u la pynbna, ia ka jingshimkhia da ka sorkar jylla, ban kyntiew ia ka jingpynmih ia ki karkhana siej bad kiwei kiwei ki ksai hapoh ka jylla kaban ailad ia ki nongthain bad ki nongpynmih ia ki jingshna kti ban ioh ia ki tiar, ka jingmang pisa bad ka jingpyniasoh ruh sha ki iew ki hat ban kyntiew pat ia ka ioh ka kot jong ki bad kumjuh jong ka jylla hi baroh kawei, da kaba bynrap ruh, ba ka jylla Meghalaya ka dei ruh kaba riewspah na ka jingdon jong ki siej, ki kait, ki ksai ryndia bad kiwei kiwei kiba ngi dei ban tynkai ia ki na bynta ka jingmyntoi jong ka mariang bad ka ioh ka kot, ha kaba lyngba ka jingpynmih ia ki siej ka sorkar ka don ia ka thong ban pynlong kum ka jylla kaba lamkhmat kaban pynmih ia u ksai tynrai. La plie paidbah ruh ïa ka Cultural & Textile Exhibitions, ban pyninam ia ki tiar thain bad ki jingpynmih ia ki tiar shna hi ba pynmih kylleng ki jylla bad ruh ia ka Souvenir jong ka National Symposium.